“Нёман” прайграў у гасцёх “Шахцёру”

|

У першым тайме гульні ў Салігорску гарадзенцы спрабавалі навязаць лідэру чэмпіянату сваю гульню.

 

Сяргей Саладоўнікаў выставіў у аснове адразу чатырох гульцоў атакуючага складу – Андрэя Лясюка, Нікаласа Сеаліна, якому дасталося нядаўна завочна ад Сямёна Шапіры, Паўла Савіцкага ды навабранца Ягора Зубовіча. У цэнтры паўабароны выйшаў яшчэ адзін дэбютант каманды – дасведчаны камерунец Эсамэ.

 

Момантамі каманда глядзелася цалкам нядрэнна. Пасля ўдара Сеаліна брамнік “Шахцёра” з цяжкасцю дастаў мяч з-пад папярэчыны.

 

На гэты момант лік ужо быў 1-0 на карысць гаспадароў, якія ўдала скарысталіся кутнім.

 

У пачатку другога тайму гарнякі забілі яшчэ раз і “Нёман” панік канчаткова. За ўвесь другі тайм у каманды толкам не атрымалася аніводная атака, а адзіны трапны ўдар па браме здзейсніў Павал Савіцкі ўжо ў дададзены час.

 

А вось гульцы “Шахцёра” маглі забіць яшчэ некалькі разоў, але гарадзенцаў ратаваў Сяргей Чэрнік.

Пасля паразы ў Салігорску “Нёман” застаўся на 8-м месцы турнірнай табліцы. Наперадзе ў каманды дзве хатнія сустрэчы (“Гомель” і “Дынама-Мінск”) і гульня ў гасцёх супраць жодзінскага “Тарпеда-БелАЗ”, ад якога гарадзенцы адстаюць пакуль на адно ачко. 

 

4 жніўня. “Шахцёр” – “Нёман” 2:0 (Таіна Сора, 11 хв., Дзмітрый Асіпенка, 53 хв.)

 

На здымку: Сяргей Чэрнік уратаваў каманду ад буйной паразы.

 

Фота: Пётр Карнаух, fcshakhter.by