“Нёман”: адступаць няма куды

|

Нагадаем, што 5 ліпеня гарадзенцы саступілі ў гасцёх сваім прынцыповым супернікам за выхад у шасцёрку мацнейшых каманд з лікам 0-1.

 

Перамогу “Тарпеда-Жодзіна” прынёс трапны ўдар з пенальці ў выкананні Вячаслава Глеба (48-я хв.).

 

Пасля гэтай паразы каманда Сяргея Саладоўнікава апусцілася зноў на 8-мы радок у турнірнай табліцы.

 

1 “Дынама-Мінск” 38
2 БАТЭ, Барысаў 37
3 “Нафтан”, Наваполацк 28
4 “Шахцер”, Салігорск 26
5 “Тарпеда-БелАЗ”, Жодзіна 25
6 “Гомель” 23
7 “Мінск” 19
8 “Нёман”, Гродна 19
9 “Слуцк” 17
10 “Дынама-Брэст” 13
11 “Белшына”, Бабруйск 10
12 “Днепр”, Магілёў 10

 

Турнірныя перспектывы “Нёмана” пагаршаюцца тым, што чатыры з шасці апошніх гульняў першага этапу чэмпіянату гарадзенцам давядзецца згуляць у гасцёх.

 

У тым ліку – супраць непасрэдных канкурэнтаў за месца ў шасцёрцы – “Гомеля” і “Мінска”.

У дадатак супернікам гарадзенцаў у адной з двух хатніх сустрэч будзе БАТЭ, які мае сёлета “зуб” на “Нёман” за паражэнне ў Кубку Беларусі і нічыю на сваім полі ў сустрэчы чэмпіянату краіны.

 

Дадамо да гэтага дзьве гульні Лігі Еўропы (хутчэй за ўсё – супраць ісландскага “Хабнарф’ёрдура”), якія забяруць шмат сілаў і зробім выснову, што толькі цуд дапаможа сёлета “Нёману” пазмагацца за захаванне леташніх пазіцый, калі каманда фінішавала 4-й.

 

Мінулагодняя практыка паказвае, што каб гарантаваць сабе месца  шасцёрцы лідэраў чэмпіянату, трэба набраць на першай стадыі чэмпіянату не менш за 30 ачкоў. Гэта азначае, што ў шасці бліжэйшых сустрэчах чэмпіянату гарадзенцам трэба перамагаць чатыры разы!

 

Таму больш верагодным выглядае сцэнар, паводле якога наш клуб будзе ўвосень гуляць у турніры за 7-12-я месцы са слабейшымі камандамі вышэйшай лігі. А гэта будзе азначаць яшчэ меншую колькасць гледачоў на трыбунах стадыёну.