Яшчэ адныя курсы беларускай мовы распачалі працу ў Гродне
Заняткі “Моваведы” павінны былі распачацца ў Чырвоным касцёле на Дзевятоўцы.
Але пасля з’яўлення ў інтэрнэце абразлівых каментаў пра “польскую пятую калону, якая за заходнія грошы збіраецца сеяць раскол сярод беларусаў” мясцовай арганізатарцы курсаў за дзень да пачатку заняткаў затэлефанаваў святар і адмовіў у памяшканні. Як кажуць, “вы же понімаеце”…
Нягледзячы на гэта, “Моваведа” у Гродне ўсё ж стартавала.
У офіс грамадскага аб’яднання “Цэнтр “Трэці сектар” на вул. Будзёнага 13 лістапада прыйшло больш за 20 чалавек самага рознага ўзросту і розных прафесій (студэнты, офісныя работнікі, будаўнік, электрык, пенсіянеры, філолагі і інш.).
– “Я хачу бачыць у людзях не проста жаданне вывучыць словы “асадка”, “фіранка”, “імбрык”, але праз гэта змяняць грамадства да лепшага, каб любові да сваёй краіны, народа, гісторыі стала больш.
Арганізатары курсаў “Моваведа” у Гродне – Таццяна Сушко і Аляксей Шэін
Калі беларуская мова стане адной з цаглінак гэтага лепшага беларускага дома – я буду вельмі шчаслівы!” – патлумачыў свой падыход да арганізацый моўных курсаў Аляксей Шэін (дарэчы, сам былы гарадзенец).
Што тычыцца зместу першых заняткаў, то яны былі прысвечаныя найперш знаёмству паміж курсантамі, а таксама засваенню вітальных і развітальных словаў у беларускай мове.
Наступныя заняткі курсаў пройдуць у чацьвер, 20 лістапада, таксама па адрасе вул. Будзёнага, 48а-63.
Нагадаем таксама, што па панядзелках па гэтым жа адрасе адбываюцца заняткі курсаў “Мова Нанова”.