Стары замак рыхтуюць да рэканструкцыі

Першы этап работ прадугледжвае рэканструкцыю часткі замка – ад палаца, далей ўваходная група (вароты) і прыкладна палова сцяны над Нёманам.

 

Другі этап – сам палац, а трэці – двор з усімі будынкамі.

 

Стары замак ужо даўно чакаў рэканструкцыі. Планы па яе правядзенні былі распрацаваныя яшчэ 30 год таму.

 

Адной з прычын, якія прыспешылі пачатак прац, стала аварыйная сітуацыя ў адным з залаў музея, дзе правалілася падлога.

 

Плануецца, што пасля рэканструкцыі замак стане помнікам архітэктуры эпохі Адраджэння – такім, якім выглядаў у часы Стэфана Баторыя ў 1580-я гады.

 

Дырэктар гісторыка-археалагічнага музея Юры Кітурка ўвосень мінулага года ў інтэрв’ю журналістам казаў, што пры ўмове належнага і безперапыннага фінансавання  працы па рэстаўрацыі Старога замка можна скончыць за пяць год.

 

Пры гэтым кошты рэканструкцыі могуць перавысіць выдаткі на аднаўленне Нясвіжскага і Мірскага замкаў.

 

Афіцыйныя крыніцы падаюць кошт рэканструкцыі Нясвіжскага замка ў 55 міліёнаў даляраў. 

 

Цяперашні праект рэканструкцыі замка падабаецца не ўсім.

 

Да прыкладу, гарадзенскі гісторык Сцяпан Стурэйка лічыць, што гэты праект з пункту гледжання сучаснай тэорыі рэстаўрацыі крыху састарэў.

 

На яго думку, новы вобраз замка эпохі Стэфана Баторыя будзе нагадваць палац Папялушкі ў Дыснэйлэндзе.

 

Такім бачыць Стары замак аўтар праекта яго рэстаўрацыі архітэктар Бачкоў

 

На думку гісторыка, больш карэктным было б паказаць усе сляды гісторыі замка ў розныя перыяды яго існавання.

 

Фота Юрыя Яўменава