Прывіды крызісу: Гарадзенцы скупілі амаль усю валюту ў абменніках

Прывіды крызісу: Гарадзенцы скупілі амаль усю валюту ў абменніках

Пачалі наш абход з пункту абмену валют “Беларусбанка” на Чыгуначным вакзале.

– Добры дзень, а ці можна купіць 100 даляраў ЗША?

– Добры дзень, столькі не будзе, ёсць толькі 16 даляраў.

– А Еўра ёсць?

– Так, але ўсяго 65 еўра.

– А якая валюта яшчэ ёсць?

–  Злотыя і расійскія рублі, іх шмат, колькі Вам трэба?

–  Дзякуй, але мне трэба толькі даляры.

 

Далейшым пунктам стаў абменнік у гасцёўне “Гродна”.

 

– Добры дзень, скажыце, а даляры ЗША ёсць?

– Добры, а колькі Вам трэба?

– Мінімум 100.

– Толькі 60 ёсць.

– А 100 еўра будзе?

– Не, толькі 45, браць будзеце?

– Дзякуй, не трэба.

 

У абменным пункце на рынку па вул. Паповіча адбыўся практычна такой жа дыялог. У абменніку ў “Алмі” па вул. Савецкіх Памежнікаў – тая ж праблема. Але ўдалося трошкі паразмаўляць з касірам:

 

– Яшчэ два дні таму былі вялікія чэргі, як толькі курс пачаў варушыцца, а зараз усю валюту выграблі, вось і чэргі зніклі, бо наш абменны пункт амаль не мае замежная валюты.

 

Мы вырашылі змяніць тактыку – паспрабаваць не купіць валюту, а памяняць 20 даляраў са 100. “Беларусбанк” па вул. Кастрычніцкая:

 

– Добры дзень, памяняйце калі ласка 20 даляраў са 100.

– Дзень добры, зараз пагляджу, ці ёсць рэшта… Магу памяняць толькі 50 (паказвае дзве купюры па 20 і адну па 10 даляраў ЗША).

– Не, дзякуй.

 

Гандлёвы цэнтр “Фламінга” на Фолюшы, абменны пункт “Белінвестбанку” на 1 паверсе:

– Памяняйце калі ласка 20 даляраў са 100.

–  Няма рэшты, у касе толькі 35 даляраў ЗША, будзеце мяняць?

– Не, да пабачэння.

 

Мужчына, які стаяў ззаду ў чарзе, нечакана выдаў: “Вы лепей схадзіце на міні-рынак які і паспытайце ў гандляроў, я менавіта так і змог памяняць учора 50 са 100, бо ў абменніках не было рэшты”.

 

Чуткі ўсё ж такі спраўдзіліся: гарадзенцы за некалькі дзён выкупілі амаль усю замежную валюту ў абменных пунктах горада.

 

На таргах на Беларускай валютна-фондавай біржы 21 жніўня курсы даляра і еўра пабілі чарговыя рэкорды: курс даляра вырас на 232 рублі або 1,40% да 16730 рублёў, курс еўра вырас на 499 рублёў або 2,72% да 18837 рублёў.