Гіртс Карлсанс: Калі “Нёман” не разлічыцца да 1 верасня, мой агент дашле лісты ў ФІФА і УЕФА
Да першага верасня нам трэба разлічыцца з адным гульцом, які ўжо даўно пакінуў каманду – Гіртсам Карлсансам.
Ці атрымаецца? Хочацца ў гэта верыць. Але, шчыра кажучы, сітуацыя вельмі складаная: на клубе вісіць прыстойны штраф, і таму наш рахунак заблакаваны.
Дзяржкантроль выявіў пэўныя парушэнні папярэдняга кіраўніцтва – яшчэ па мінулым годзе. А расхлёбваць сітуацыю зараз прыходзіцца ўжо нам.
Акрамя выплаты Карлсансу, трэба знайсці вельмі вялiкую суму, секунду патрымаць яе ў руках – і аддаць. Сякія-такія планы ёсць – застаецца чакаць, у што яны выльюцца … – сказаў Варсовiч.
Тым часам карэспандэнт “Твайго стылю” звязаўся з самім латвійскім нападаючым:
– Да гэтага моманту “Нёман” са мной не разлічыўся.
Я да апошняга чакаў, але справа не рухалася з мёртвай кропкі. Тады я вырашыў звярнуцца ў Беларускую федэрацыю футболу. Яна ўжо даручыла гарадзенскаму клубу разлічыцца са мной да 1 верасня.
Калі ж не паспеюць, то клубу будуць выстаўлены санкцыі, а таксама мой асабісты агент адправіць ліст у ФІФА і УЕФА.
Дакладную суму я назваць не магу, але памятаю, што некалькі заробкаў – распавёў Гіртс.
Зараз Карлсанс гуляе ў Латвіі за “Вентспілс”.
За час, праведзены ў “Нёмане”, латвійскі нападнік правёў на полі 11 гульняў і забіў 1 мяч.
Фота fcneman.by