Турыстычны нямецкамоўны даведнік пра Гарадзеншчыну цяпер ёсць у друкаваным выглядзе

|

Стваральнік сайту Андрэ Бём – беларусіст і літаратуразнаўца з Германіі. Агулам ён пражыў у Беларусі больш за дзесяць гадоў, з іх чатыры – у Гродна. За гэты час ён паспеў папрацаваць выкладчыкам нямецкай мовы ў ГрДУ, стварыць першы нямецкамоўны сайт пра Гродна і нават ажаніцца на беларусцы.

 

Сайт www.mein-grodno.eu задумваўся як студэнцкі праект, але стаў паўнавартасным даведнікам-пуцяводнікам па Гарадзеншчыне для нямецкамоўных. У ім змешчаны нарысы пра Гарадзеншчыну. Першапачаткова Андрэ бачыў праект у выглядзе кнігі, але ў Беларусі не знайшоў фінансавання. Сёлета летам ён з сям’ёй вярнуўся ў Германію і выдаў кнігу там. Друкавалася яна ў вадавецтве “Trescher”, якое займаецца выпускам даведнікаў па Еўропе, СНД, Каўказе і краінам Балтыі.

 

Кніга мае назву “Weissrussland – multikulturelles erbe in der mitte Europas”, што значыць “Беларусь – мульцікультурная спадчына ў цэнтры Еўропы”. Андрэ кажа, што “Weissrussland” – не зусім правільны варыянт назвы нашай краіны, і ў самой кнізе рэч ідзе толькі пра “Belarus”.

 

На старонцы кнігі Ўкантакце(https://vk.com/club98546039) Андрэ кажа, што вельмі сумуе на Беларусі, па тых мясцінах, якія ён наведаў, і па беларускім піве.