“Эколагі і штучная елка выконваюць сваю працу добра”. У Гродне падае попыт на жывыя елкі

|

У гэтым годзе, як і ў мінулым, у Гродне плануецца 19 гандлёвых кропак. У продажы будуць елкі, хвоі, букеты і елкі ў кадках. Апошнія будуць прадавацца, хутчэй за ўсё, у сядзібе лясгаса ў Пышках. Такіх елак у мінулым годзе прадалі 110 штук, у пазамінулым – 350. Такой навагодняй прыгажуні пасля святаў можна даць другое жыццё.

 

Цэны на навагоднюю елку ў Гродне:

да 1 метра – 85 тыс.

ад 1 метра да 2 – 110 тыс.

ад 2 метраў да 3 – 165 тыс.

Цана на елку ў кадцы яшчэ пралічваецца.

 

Рэалізацыя навагодніх прыгажунь пачнецца з 21 снежня. Час працы елачных рынкаў з 11.00 да 20.00

 

Людзі аддаюць перавагу штучным елкам

 

Хаця попыт на жывую елку з кожным годам змяншаецца, нарыхтоўка святочных дрэў застаецца ранейшай. Прадстаўнікі Гарадзенскага лясгаса адзначаюць, што эколагі і штучная елка выконваюць сваю працу вельмі добра.


– У мінулым годзе мы рэалізавалі каля 29 тысяч елак па ўсёй вобласці. У Гродне больш за 7 тысяч. Але варта адзначыць, што аб’ёмы рэалізацыі падаюць з году ў год. Верагодней за ўсё, людзі аддаюць перавагу штучным елкам. І ўсё больш і больш людзей лічыць, што жывыя елкі ствараюць шмат праблем, – распавёў вядучы інжынер вытворчасці і рэалізацыі прадукцыі гарадзенскага лясгаса Яўген Думчаў.