Інтэрактыўная мапа веламаршрутаў і веладарожак ствараецца на Гарадзеншчыне
Алег Андрэйчык падкрэсліў, што азнаёміцца з пілотным варыянтам карты можна на сайце ўпраўлення спорту і турызму. Пакуль на ёй нанесеныя маршруты ў абласным цэнтры, аднак мапа ўвесь час папаўняецца.
“Для папулярызацыі веларуху, як актыўнага адпачынку і магчымасці для падарожжаў, вырашана не радзей за адзін раз у месяц ладзіць масавыя велапрабегі па найбольш цікавых і маляўнічых месцах, у тым ліку па турыстычных маршрутах у гарадах і сельскіх населеных пунктах”, – адзначыў Алег Андрэйчык. Плануецца, што велапрабегі будуць праводзіцца кожную першую нядзелю месяца.
Веласіпедысты атрымаюць магчымасць, напрыклад, праехацца ў кампаніі па цэнтральных вуліцах горада. Сёння агульная працягласць добраўпарадкаваных веладарожак у Гродзенскай вобласці перавышае 200 км, створана таксама больш за 40 веламаршрутаў працягласцю каля 1,3 тыс. км.
Да канца года плануецца стварыць каля 20 новых веламаршрутаў, якія пройдуць па маляўнічых і цікавым з турыстычнага пункту гледжання месцах. Таксама распрацоўваюцца заяўкі на ўдзел у трансгранічных праектах міжнароднай тэхнічнай дапамогі, праз удзел у якіх раней уладкавалі некалькі новых веладарожак і веламаршрутаў.