“Это был приказ”. Как в Сирии погиб российский военный, уроженец Гродно
Па дадзеных тэлеканала “Белсат”, Уладзімір Бекіш быў падпалкоўнікам сухапутных войск РФ, яго спецыяльнасць – ваенная разведка. У пачатку 2016-га, згодна з інфармацыяй з яго профілю ў сацыяльных сетках, Бекіш быў камандзірам разведроты 5-й Асобнай танкавай брыгады, воінская часць 46 108. Гэтыя звесткі пацвярджаюць ягоныя калегі. Месцам дыслакацыі 5-й асобнай гвардзейскай Тацынскай Чырванасцяжнай ордэна Суворава 2-й ступені танкавай брыгады, або в/ч 46 108 Расіі, з’яўляецца станцыя Дывізіённая недалёка ад Улан-Удэ.
Фота: ok.ru
– Нас вельмі засмучаюць усе тыя каментары, якія з’явіліся ў інтэрнэце. Мой брат – адназначна герой, – упэўненая сястра Уладзіміра Святлана. – Расійская армія зрабіла ўсё, каб бацькі змаглі развітацца з Валодзем. Мы ім вельмі ўдзячныя. Хацелася б яшчэ сказаць, што грамадзянства ў майго брата было расійскае. Як так атрымалася? Мы – дзеці вайскоўцаў, бацькі ездзілі па ўсім Саюзе, потым вярнуліся сюды, у Гродна, а ён застаўся там служыць. Пазнаёміўся з будучай жонкай, пажаніліся, потым нарадзіўся сын. Ён прыязджаў сюды кожны год. Мы былі вельмі дружныя. Ведаеце, як гэта бывае ў сем’яў вайскоўцаў – бацькі на зборах, а мы ў гарадку. Адзін за аднаго трымаліся, адзін аднаму дапамагалі.
Уладзімір Бекіш ў 1995 годзе скончыў Новасібірскае вышэйшае ваенна-палітычнае агульнавайсковае вучылішча, ваяваў у Чачні.
– Ён абараняў усіх нас ад тэрарыстаў, – кажа Святлана.
– А як загінуў?
– Ну хто ж вам скажа афіцыйна? Нам казалі неафіцыйна, што іх абстралялі баевікі.
– У Сірыі?
– Так.
– Чаму ён там апынуўся?
– Гэта быў загад.
А вось што кажа адзін з яго таварышаў па службе:
– Добрым ён быў чалавекам. Справядлівым, пісьменным, чалавечным… Я з ім пазнаёміўся некалькі гадоў таму, служылі разам тры гады ў танкавай брыгадзе. Апошні раз мы з ім размаўлялі месяцы тры таму, я як раз быў там, адкуль ён жывым не вярнуўся. Ён пажадаў мне ўдачы. Тады ён яшчэ не ведаў, што сам туды паедзе. Яму проста не пашанцавала. Многія думаюць, што там нічога страшнага не адбываецца, хтосьці рвецца туды грошай падзарабіць, але я не думаю, што Валодзя паехаў туды зарабляць. Прафесія ў яго такая – выведка… Яны заўсёды наперадзе ўсіх, ад іх дзеянняў і пісьменнасці шмат у чым залежыць поспех таго ці іншага мерапрыемства… Вось і склаў галаву Уладзімір за мір ва ўсім свеце! Спадзяюся, што Радзіма не пакіне яго сям’ю па-за ўвагай, дапаможа і падтрымае!
Па словах сваякоў, Уладзімір Бекіш пасмяротна прадстаўлены да ўзнагароды.
– Зараз дакументы ляжаць на подпісы ў Пуціна і Шайгу. Нашы бацькі збіраюцца ехаць у Крэмль на ўручэнне ўзнагароды, – кажа Святлана.
Аднакласнік гарадзенца з Ісламскай дзяржавы: Добра вучыўся, нічога экстрэмісцкага ў ім не было
“Канфлікт у Сірыі падаецца як “вайна без страт”
Сітуацыю TUT.BY пракаментаваў ваенны эксперт “Новой газеты” Павел Фельгенгаўэр:
– Расійскія войскі на тэрыторыі Сірыі знаходзяцца афіцыйна. Яны могуць знаходзіцца (і знаходзяцца) па ўсёй тэрыторыі краіны. У Сірыі прысутнічаюць паветрана-касмічныя сілы, сухапутныя войскі, прадстаўнікі ваенна-марскога флоту, спецназ. Нават генерал-палкоўнік, камандуючы аперацыяй у гэтай краіне, прадстаўляе сухапутныя войскі. Таму ў дадзенага ваеннага цалкам магла быць афіцыйная камандзіроўка ў гэтую блізкаўсходнюю краіну.
– Чаму пахаванне гэтага вайскоўца ў Беларусі суправаджалася такой сакрэтнасцю?
– Каб лішні раз не звяртаць увагу звычайных людзей на гэтыя баявыя дзеянні, таму што канфлікт у Сірыі падаецца як “вайна без страт”.
Расія раней – да гібелі Бекіша – афіцыйна пацвярджала гібель 11 вайскоўцаў у Сірыі. Афіцыйнай інфармацыі пра смерць у Сірыі яшчэ аднаго ваеннага пакуль не было.