У Гродне стане больш кавярняў і месцаў адпачынку
Пра гэта на прэс-канферэнцыі паведаміў у пятніцу журналістам старшыня гарвыканкаму Барыс Казялкоў.
Як паведамляе “Вечерний Гродно”, ля 4-ай гарадской бальніцы замежнае прадпрыемстваў “Трыніці інвест” пачынае будаўніцтва гіпермаркета, у якім, апроч крамаў, будуць працаваць таксама каток, піўны рэстаран, піцэрыя і рэстаран сушы.
Агульны кошт будаўніцтва складзе 3 міліёны даляраў.
На месцы кавярні «Астра» (вул. Савецкая), якую выкупіла прадпрыемства “Лімож”, з’явіцца элітная кавярня на 84 месцы.
У краме “Дзіцячы свет” адчыніцца дзіцячай кавярня.
Летняя кавярня для дзяцей і дарослых будзе працаваць у Каложскім парку.
Там жа прыватны інвестар плануе збудаваць тэнісныя корты і яшчэ адну кавярню.
Усе гэтыя новабудоўлі будуць ажыццяўляцца за кошт прыватнага капітала.
Сам жа горад вымушаны карэктаваць свае планы. З-за скарачэння бюджэту ўжо давялося замарозіць будаўніцтва кортаў ля “Аквацэнтра”.
Адкладзены планы па маштабнай рэканструкцыі вул. Будзёнага.
Верагодна, што будзе прыпынены і праект па замене вокнаў у школах горада.
Усяго на запланаванае на сёлета дабраўпарадкаванне горада плануецца выдаткаваць каля 54 міліярдаў рублёў.
За гэтыя грошы, у прыватнасці, плануюць зрабіць рэканструкцыю вул. Ажэшкі, БЛК, Вялікай Траецкай, Дзяржынскага і шэрагу іншых аб’ектаў.
На здымку: Вуліцы Будзёнага давядзецца і надалей чакаць рэканструкцыі
Фота Яўгена Здановіча