Новы праект гарадзенскіх гісторыкаў: электронныя кнігі па гісторыі Гародні
Першай на старонцы з’явілася польскамоўная манаграфія Юзэфа Ядкоўскага “Абарончая святыня на Каложы ў Гародні ў святле архіўных і археалагічных даследванняў, выкананых у 1935 годзе”. Тэкст кнігі адсканаваны з выдання 1935 года студэнтамі гістфаку Гарадзенскага ўніверсітэта імя Янкі Купалы.
Ядкоўскі быў пачынальнікам археалагічнай справы ў Гародні, таму серыя публікацый распачалася ягонай манаграфіяй. У бліжэйшых планах – кніга Зігмунта Дурчэўскага, прысвечаная раскопкам Гародні ў сярэдзіне – другой палове 1930-ых гадоў, кніга Вароніна “Старажытны Гродна”.
Як паведамілі “Твайму стылю” ініцыятары праекта, кнігі будуць выкладацца на сайт кожныя некалькі тыдняў.
Гародня мае вельмі багатую археалагічную спадчыну, раскопкі ў горадзе актыўна вяліся з 30-ых да канца 80-ых гадоў мінулага стагоддзя.
Іх вынікі адлюстраваныя ў навуковых манаграфіях, але ўсе яны на сёння з’яўляюцца рэдкасцю.
Зрабіць іх больш даступнымі для гарадзенцаў пакліканы новы праект стваральнікаў http://harodnia.com/.
На фота: Ю.Ядкоўскі вядзе экскурсію на гарадзенскім замчышчы для польскіх навукоўцаў (сяр.1930-ых гг.).
Фота з Нацыянальнага лічбавага архіва Польшчы.