Яны дыхаюць адным паветрам

Маша мае першы спартовы разрад па канкуры – майстэрстве пераадолення перашкод на кані.

 

– Маша, колькі гадоў ты прысвяціла гэтаму нялёгкаму спорту?

 

– Вось ужо шосты год пайшоў, як я прыйшла на стайню.

– Не надакучыла? Бо, наколькі я ведаю, заняткі конным спортам займаюць шмат часу. А ты ж яшчэ ў школе вучышся.

 

– Не, не надакучыла. Імкнуся сумяшчаць і тое, і другое. Трэніроўкі сапраўды займаюць шмат часу. Мой адзіны выходны – нядзеля.

 

– Навошта так часта прыязджаеш?

 

– Коней працаваць трэба.

 

– Як гэта, працаваць коней?

 

– Вучыць каня розным элементам: уступкі, вольты, прыпынкі, пад’ёмы і г.д. Конь заўсёды павінен быць у стане трэнінгу.

 

– А як жа сябры, забавы?

 

– Канкур – мой выбар. Хтосьці п’е, шпацыруе, а я скачу. Гэта як самы сапраўдны наркотык: спыніцца, здаецца, немагчыма. Ды і сябры ў мяне амаль усе коннікі.

 

– У цябе ёсць любімы конь?

 

– Так, яго завуць Салярыс, па-хатняму Косцік. Чыстакроўнай верхавой пароды. Жарабец. Мой добры, самы надзейны сябр. Разумее мяне лепш за маму (смяецца).

– Што для цябе конь?

 

– Гэта мой партнёр, паплечнік. Адну справу робім.

 

– Але ты ж зверху. Кшталту галоўная.

 

– Так, хітраваць не буду. Конь павінен паважаць чалавека. А то, ведаеце, шэсцьсот кілаграм жывой вагі супраць маіх пяцідзесяці пяці – гэта значная перавага. Каб усё было гладка, я камандую парадам.

 

– Перад выездам на канкурнае поле бывае страшна?

 

– Страх скоўвае, не дае цвяроза ацэньваць сітуацыю. Калі ён ёсць, ад яго трэба пазбаўляцца. 

 

– Што значыць быць коннікам?

 

– Сапраўдны коннік з самага ранку спаўзае з ложка і адпраўляецца на стайню, нягледзячы на дождж, снег, ураган.

І нават калі нядужыцца, ён імкнецца на трэніроўку.

 

Быць коннікам – няпростае рамяство. Трэба ўмець сабрацца ў самы складаны момант, кантраляваць свае эмоцыі.

Быць адважным і рашучым, настойлівым, дзесьці нахабным. Часам коннік апрануты танней за свайго чацвераногага паплечніка. А на стале ў рамцы фотаздымак не хлапца альбо дзяўчыны, а дарагога сэрцу каня. Быць коннікам – значыць па-вар’яцку любіць сваю справу.

>

-А што трэба зрабіць, каб стаць коннікам?

 

– Прыйсці ў школу і запісацца. Для гэтага чалавек павінен падыходзіць па ўзросце. Бяруць дзяцей дзесяці-дванаццаці гадоў. Навучанне бясплатнае.

– А калі дарослы чалавек захоча навучацца верхавой яздзе?

 

– Для такіх людзей існуе пракат. Там за грошы можна навучыцца ездзіць.

 

Фота аўтара