Кубак зёлкавай гарбаты ад Марыі Апанасаўны
Такую магчымасць мелі наведвальнікі анімаванай экскурсіі “Марыя Апанасаўна запрашае”, якая адбылася 29 студзеня ў доме-музеі Максіма Багдановіча.
Гасцей пад гукі фісгармоніі сустракае маці паэта Марыя Апанасаўна.
Яна распавядае пра жыццё і лёс сям’і Багдановічаў, паказала фотаздымкі з сямейнага альбому.
Пасля гасцёўні трапляем у дзіцячы пакой. Улюбёнымі цацкамі дзяцей у сям’і Багдановічаў былі плецены кошык і драўляны конік – качалка.
Вадзім і Максім садзілі адзін аднаго ў кошык і каталі па намочанай падлозе. Пакой ахоўвае саламяная птушка пад столлю.
Пасля дзіцячага пакою крочым у пакой маці і кабінет бацькі.
У бацькоўскім кабінеце Марыя Апанасаўна чытае ліст ад Адама Ягоравіча. Муж і бацька з палымяным пачуццём дзеліцца сваімі думкамі з сям’ёй.
Пасля мемарыяльных пакояў мы наведалі і іншыя экспазіцыі музея.
Лепшай старонкай ў штодзённіку жыцця трэба назваць “Гарадзенскі перыяд сям’і Багдановічаў”. Фотаздымкі сям’і, дэбют у друку, пераклады твораў – багацце залі.
Апошняй наведанай залай стала “Літаратурна-грамадскі рух канца ХIХ – пачатку ХХ стагоддзяў”. Тут адбываецца знаёмства з газетай “Наша доля”, суполкай “Загляне сонца і ў наша аконца”.
Зноў вяртаемся ў гасцёўню, дзе нас чакае гарбата з зёлкамі.
Кожны мае магчымасць асэнсаваць анімаванае падарожжа ў жыццё нашага класіка.
Па словах Ганны Шарэнды, намесніцы фірмы “Мерцана”, якая разам з музеям і арганізавала экскурсію, такое падарожжа плануецца ажыцяўляць кожны тыдзень.
>
У час экскурсій будуць праводзіцца віктарыны, дзе падарункам будзе з’яўляцца флаер на бясплатнае наведванне музея.
Кубак зёлкавай гарбаты
запрашае ўсіх бяздольных,
хто згубіўся ў часе нудным,
хто жыве жыццём няўклюдным,
хто ў натоўпе, нібы ў полі,
хто сяброў не меў ніколі –
запрашае абагрэцца
ля паэтавага сэрца!
За драўлянымі дзвярыма
неўміручы свет Максіма…
Д. Бічэль – Загнетава
Фота аўтара