На Гродзеншчыну вяртаюцца птушкі з выраю

|

Старшыня гродзенскага аддзялення грамадскай арганізацыі “Ахова птушак Бацькаўшчыны” Дзмітрый Вінчэўскі:

 

 

Відаў трыццаць ужо прыляцела.


З-за снегу жаўрукі і кнігаўкі на пару тыдняў спазніліся, затое некаторыя, напрыклад, белая пліска, прыляцелі раней. Магчыма, яны зімавалі непадалёк, нават у Польшчы.


У асноўным жа сёлета птушкі вяртаюцца да нас з выраю ў звычайны тэрмін. 


У мінулую суботу ў горадзе заўважылі першую пустальгу, магчыма, гэта з тых, што гняздуюцца за скульптурай Святой Алены на Бернардынскім касцёле. 


Таму заўтра пойдзем да пробашча, дамаўляцца, каб зноў устанавіць відэакамеру для назіранняў за гняздом сокала-пустальгі.


Будзем рабіць ці прамую трансляцыю, ці выкладаць відэафайлы.


У мінулым годзе з дапамогай камеры атрымалася прасачыць за патаемным жыццём гродзенскіх сокалаў – ад адкладкі першага яйка да кармленне амаль дарослых птушанят.

 

Астранамічная вясна прыйдзе ў Беларусь 21 сакавіка, але ўжо сёння дзень зраўняўся з ноччу, і наступныя паўгады светлы час сутак будзе даўжэйшы за цёмны.

 

Фота з сайта http://birdwatch.by