На Гарадзеншчыне прадпрымаюцца меры па прафілактыцы віруса Е.coli
Як паведаміла “Твайму стылю” загадчыца аддзялення абласной санстанцыі Таццяна Якусевіч, з 3 чэрвеня забаронены транзіт сырой гародніны праз Беларусь.
Узмоцнены санітарны кантроль на ўсіх памежных пераходах з краінамі Еўразвязу. Адсочваецца кожная партыя сырой гародніны, якая трапляе з-за мяжы на Гарадзеншчыну.
У стане гатоўнасці знаходзяцца гарадзенскія медыкі і лабараторныя службы.
Ахвярамі гэтага вірусу ў 13 краінах Еўропы сталі каля 2,5 тыс. чалавек.
Дваццаць два чалавекі ўжо памерлі. Выпадкі захворванняў выяўленыя днямі ў суседняй Польшчы (Шчэцін і Лодзь).
Асноўнай крыніцай распаўсюджання інфекцыі яшчэ ўчора называлі адну з фермаў у Паўночнай Германіі, якая спецыялізуецца на вырошчванні экалагічна чыстай прадукцыі.
Небяспечная бактэрыя нібыта была выяўлена ў парастках семянаў, прарошчаных на ферме.
Афіцыйнага лабараторнага падцверджання гэтая версія, аднак, яшчэ не атрымала.
Раней у “справе” фігуравалі агуркі з Іспаніі, якія хутка былі “рэабілітаваныя”.
Па ўсёй Еўропе зараз заўважнае скарачэнне продажу садавіны.
Страты вытворцаў і гандляроў вымяраюцца ўжо сотнямі міліёнаў еўра.