“Прэс-фота Беларусі 2011” наведае Гродна
Конкурс беларускай прэс-фатаграфіі ладзіцца ініцыятывай “Прэс-фота Беларусі” і буйным фота-парталам “Знята”.
Сёлета ў конкурсе ўдзельнічалі больш за 70 фотажурналістаў, якія прадставілі каля 2000 здымкаў.
23 аўтара ўвайшлі ў лік пераможцаў.
Гран-пры атрымаў фотакарэспандэнт “Нашай нівы” Сяргей Гудзілін за серыю фотаздымкаў “Паўсядзённае жыццё” прысвечаную салдацкім будням у 60-ым палку сувязі ў Барысаве.
Здымак-пераможца суправаджаецца тэкстам:
“Прагляд вечаровых навін з’яўляецца абавязковым для ўсіх салдат.
У 21.00 усе ваенаслужачыя тэрміновай службы абавязаны глядзець інфармацыйную праграму “Панарама” на дзяржаўным канале беларускага тэлебачання.
Гэты элемент ідэалагічнага выхавання вайскоўцаў выкарыстоўваўся яшчэ ў арміі Савецкага Саюзу і захаваўся ў беларускай арміі, якая лічыць сябе пераемнікам традыцый савецкіх Узброеных Сіл”.
Вынікі Прэс-фота Беларусі 2011 былі падведзены яшчэ ў маі, аднак гродзенцы першымі пасля цырымоніі ўзнагароджання пераможцаў змогуць убачыць выставу лепшых фотаздымкаў.
Спробы зладзіць выставы ў Мінску і Маладзечне скончыліся нічым.
Выстава Прэс-фота Беларусі 2011 будзе працаваць у “Крызе” з 18 жніўня да 4 верасня.
Адкрыццё 18 жніўня ў 18.30.