Віталь Карповіч: Дайце мне шырокавугольны аб’ектыў і больш часу

| Без катэгорыі

Адметным ролік робіць тэхніка яго выканання Timelapse – пакадравыя здымкі ў руху.

 

Здымкі робяцца на фотакамеру, але пасля мантажу выглядаюць як відэа. Тэхніка ўжо набыла папулярнасць ва ўсім свеце, але беларускіх аўтараў такіх шэдэўраў адзінкі.

 

Аўтар відэа-візітоўкі Гродна – Віталь Карповіч (arixonix) – сёння студэнт трэцяга курсу Пецярбурскага ўніверсітэту кіно і тэлэбачання, які сам паходзіць з Гродна.

 

Мы задалі яму некалькі пытанняў.

 

Што значыць твой “нік” arixonix?

-Многія пытаюць. У школьныя гады я ўбачыў цацку з падобнай назвай і мне спадабалася.

 

Віталь, што цябе падштурхнула да ставарэння відэа-роліка пра Гродна?

-Мяне натхніў усім вядомы ролік з мінскімі таймлапсамі  Арцёма Прадко (zweizwe), які я ўбачыў дзесяць месяцаў таму.

Але тады ў мяне яшчэ не было свайго фотаапарата.

 

Ці задаволены ты сам вынікам?

-Канешне, можна было зрабіць больш і лепш, калі б была тэхніка круцейшая  і больш часу на наведванне Гродна.

Але парадавалі каментары кшталту “як ролік пра Менск” альбо “гэта лепшае пра Горадню”.

 

Чаму на відэа так мала гістарычных аб’ектаў горада?

-У старым горадзе вузкія вулачкі і з маёй тэхнікай падабрацца цяжка. Дайце мне шырокавугольны аб’ектыў, каб да іх падабрацца, і больш часу.

 

Колькі часу ў цябе занялі здымкі?


-Складана пралічыць, у суме каля дзесяці дзён.

Каб зняць тры секунды туманнага світанка  даводзілася прачынацца  вельмі рана або зусім не спаць.

Увогуле часта была праблема з сонцам, я сачыў за святлом і за тым, з якога боку ў які час сутак асветлены будынак.

Мантаж і апрацоўка ішлі паралельна здымкам.

Усё ў адно звёў я ўжо ў Пецярбурзе за палову ночы.

 

А як ты падбіраў музыку?

Музыку я слухаў падчас здымкаў.

Філ выдатны кампазітар, на яго творчасць я трапіў гэтым летам, і моцна на яго “падсеў”.

Спачатку хацелася чаго-небудзь сонечнага, але музыка Філа выйгравала эфектнасцю і рытмічнасцю.

Дарэчы, асобная падзяка Філу за тое, што пагадзіўся па маёй просьбе падрэдагаваць сваю музыку для гэтага відэа.

 

“Philip Zhybin, вядомы пад псеўданімам Phil Gloire” – выдае яго афіцыйная старонка.

Сам ён з Гродна. Больш пра яго я нічога сказаць не магу, бо мы знаёмыя толькі он-лайн і з зусім нядаўніх часоў.

 

Ці прапаноўвалі табе размясціць ролік на гродзенскім тэлебачанні?

-Так, з прапановай зрабіць яго трансляцыю на табло, якое стаіць на Савецкай плошчы.

Але гуку табло не мае,  і давялося адмовіць з-за павагі да аўтара музыкі і сваіх намаганняў у яе падборы і мантажы.

 

Плануеце яшчэ рабіць ролікі? Можа ёсць ужо якія-небудзь ідэі?

Аб сваіх планах казаць глупа.

Пакуль у мяне вучоба ў Пецярбурзе.

Аб тым, што я збіраюся зрабіць, кажу толькі самым блізкім, бо можа не атрымацца, ці я перадумаю.

Астатнім лепш паказваць ужо гатовае.