Баявая нічыя “Нёмана” і чарговая параза “Белкарда”
Гульня выдалася цікавай, двухбаковавострай і да апошняй хвіліны трымала глядачоў у напружанні.
У пачатку гульні каманды больш прыглядаліся адна да адной, шмат змагаліся, парушалі правілы ў цэнтры полі. Брамнікі абодвух каманд у гэты час заставаліся без працы.
Але бліжэй да сярэдзіны першага тайму “Нёману” удалося узяць ніткі гульні ў свае рукі і правесці некалькі небяспечных атак, адна з якіх і прывяла да гола Паўла Савіцкага (у пасляматчавым пратаколе менавіта малады гарадзенец значыцца аўтарам першага забітага мяча, хаця бяз дапамогі абаронцы “Гомеля” мяч наўрад ці трапіў у браму).
На гэтым футбалісты “Нёмана” не спыніліся і працягвалі насядаць на браму гасцей. Да перапынку добрыя шанцы вызначыцца мелі Іван Дзянісевіч і мабыць самы актыўны у першым тайме гулец зялёна-жоўтых Павал Савіцкі.
Другі тайм гарадзенцы пачалі актыўна. Аляксей Сугак прайшоў па праваму флангу і зарабіў вуглавы. А Іван Дзянісевіч падаў дакладна на галаву Паўлу Рыбаку (на здымку ў момант галявога ўдару), які на 48-й хвіліне матчу зрабіў лік 2:0 на карысць “Нёмана”.
На гэтым, на жаль, атакуючы запал гаспадароў пачаў паціху затухаць. І прыезджыя футбалісты паступова перахапілі ініцыятыву.
Ля варот Андрэя Гарбунова станавілася ўсё гарачэй і на 70 хвіліне Ігар Кузьмянок пасля вуглавога скараціў разрыў у ліку.
А праз 10 хвілін пасля грубай памылкі паўабаронцы “Нёмана” Дзмітрыя Лебядзева на табло высвяціўся канчатковы лік 2:2. Вызначыўся Максім Лісавы.
Пасля 29 тураў “Нёман” займае 9-ты радок у турнірнай табліцы вышэйшай лігі.
У суботу свой матч у лізе рангам ніжэй праводзіў “Белкард”. Гродна наведала каманда “Клечаск” з Клецку. Гарадзенцы пры неблагой гульні зноў саступілі.
На тры гасцявыя мячы “завадчане” змаглі адказаць толькі адным у выкананні Паўла Гайдоўскага, чым максімальна ўскладнілі сабе задачу захаваць за сабой месца ў першай лізе.
У панядзелак стала вядома, што галоўны трэнер “Белкарду” Павал Бацюта адпраўлены ў адстаўку. Да канца сезону яго абавязкі будзе выконваць Артур Крыванос, які працаваў у камандзе другім трэнерам.
“Белкард” знаходзіцца на 15-м радку табліцы першай лігі.
Вынікі іншых матчаў з удзелам каманд з Гарадзеншчыны глядзіце ніжэй.
Чэмпіянат Беларусі па футболе ў першай лізе:
“Смаргонь” – “Славія-Мазыр” – 0:2.
Чэмпіянат Беларусі па футболе ў другой лізе:
“Ліда” – “Камунальнік”(Слонім) – 1:0.
“Белтрансгаз”(Слонім) – “Нёман”(Масты) – 3:0.
Фота: fcneman.by
Відэа: football.by