Прэзентацыя новай кнігі Алеся Краўцэвіча адбудзецца ў “Крызе”
Наведнікаў будуць сустракаць рыцары, мерапрыемства аздобіць сярэднявечная музыка ў жывым выкананні.
Пачатак прэзентацыі ў мастацкай галерэі “Крыга” ў 18 гадзін.
Пра сваю кнігу “Твайму стылю” распавёў Алесь Краўцэвіч:
– Мая новая кніга – літаратурнае эсэ, але заснаванае на дакументах.
Я гісторык, таму не магу фантазіраваць (дысцыпліна абавязвае), магу толькі рэканструяваць падзеі на падставе дакументаў.
Гэта біяграфія манарха, які упершыню аб’яднаў у адной дзяржаве ўсе гістарычныя землі Беларусі. Гэта стала адным з чыннікаў стварэння беларускага народа.
Гедымін быў больш дыпламат, чым ваяр, больш стваральнік, чым разбуральнік, – вельмі рэдкая рыса для тагачаснага манарха.
Кніга на беларускай і ангельскай мовах, выдатна ілюстраваная, таму ў мінскіх крамах яе добра набываюць замежнікі.
На выставе твораў Ігара Гардзіёнка, якая будзе працаваць у галерэі “Крыга” як мінімум 2 тыдні, кніжныя ілюстрацыі можна будзе ўбачыць у натуральную велічыню.
Новую кнігу Алеся Краўцэвіча можна набыць праз інтэрнэт і ў кнігарнях “Белкнігі”.
Здабыць выданне “Гедымін. Каралеўства Літвы і Русі (1316-1341)” з аўтографам аўтара можна будзе і падчас прэзентацыі.
Гэта першая прэзентацыя кнігі, якая выйшла з друку ў красавіку.
Наступная адбудзецца ў Цэнтры сучаснага мастацтва ў Мінску.
Здымак з сайта http://nn.by