Праз мяжу ў госці
За лепшым жыццём на захад у абыход памежных пунктаў пропуску ідуць грамадзяне Грузіі (большасць нелегалаў), Уятнаму, Беларусі, Расіі, Афганістану, Лівану.
Спробы пранікнення нелегалаў з-за заходняй мяжы на тэрыторыю Беларусі рэгіструюцца значна радзей, але здараецца і такое.
Сайт gpk.gov.by паведамляе пра трох парушальнікаў, затрыманых беларускімі памежнікамі ў апошнія дні.
Два грамадзяніна Літвы з Эйшышкесэ на падпітку накіраваліся да сяброў у Радунь (Воранаўскі раён). Без прыгод нелегальна перайшлі мяжу, і працягнулі застолле ўжо на беларускай тэрыторыі.
Магчыма пазней яны б паспяхова вярнуліся дамоў, але ўначы ім захацелася папаліць. За цыгарэтамі накіраваліся ў мясцовую краму, якая, натуральна, была зачыненая.
Тады парушальнікі проста скралі цыгарэты з крамы.
Іх аператыўна затрымалі супрацоўнікі Воранаўскага РАУС.
Гасцям давядзецца адказаць за парушэнне не толькі памежнага, але і крымінальнага заканадаўства.
Раніцай 10 студзеня смаргонскія памежнікі затрымалі за парушэнне мяжы яшчэ аднаго грамадзяніна Літвы. Пры сабе ён меў пашпарт без беларускай візы.
41-гадовы мужчына паспеў адыйсці ад мяжы на адлегласць 400 метраў.
Жыхар Вільні патлумачыў, што праз Беларусь спадзяецца дабрацца да Расіі, дзе плануе атрымаць статус уцекача.
Пакуль што нелегала змясцілі ў ІЧУ Смаргонскай памежнай групы.
Здымак http://news.21.by