Лукашэнка сустракаецца з Сікорскім па справе СПБ

Польскі міністр замежных справаў Радаслаў Сікорскі і прэзідэнт Беларусі Аляксандр Лукашэнка будуць размаўляць пра рашэнне канфлікту вакол польскай меншасці у Беларусі.


Як піша польская “Gazeta Wyborcza”, сустрэча адбудзецца ў Кіеве на інаўгурацыі ўкраінскага прэзідэнта Віктара Януковіча. Размову зыніцыянаваў польскі міністр, піша interia.pl.

Сікорскі мае прад’явіць дзве ўмовы, дзякуючы якім можна прыйсці да пагаднення. Па-першае, легалізацыя абодвух саюзаў палякаў у Беларусі: таго, якім кіруе Анджаліка Борыс, і таго, якім кіруе Станіслаў Семашка. Па-другое, падзел маёмасці саюзу напалову.

Радаслаў Сікорскі раніцай размаўляў са сваім беларускім калегам, міністрам замежных спраў Беларусі Сяргеем Мартынавым. Польскі міністр застаўся задаволены размовай: ён бачыць шанец на стварэнне працоўнай групы па вырашэнні праблемаў.

Сікорскі прад’явіў дамову non paper, г. зн. неафіцыйны дакумент з асноўнымі ўмовамі пагаднення.

Рэзалюцыю супраць пераследаванняў палякаў у Беларусі мае прыняць і Еўрапейскі Парламент. Галасаванне адбудзецца не раней, чым праз 2 тыдні.

Здымак з www.gover.pl