Улады збіраюцца зачыніць “Нашу Ніву” і “Народную волю”

|

Гэтае рашэнне прынята ў адпаведнасці з падпунктам 2.2. пункта 2 арт.51 закона Беларусі «Аб сродках масавай інфармацыі» ў сувязі з вынясеннем рэдакцыям названых выданняў на працягу года двух і больш пісьмовых папярэджанняў.

 

“Твой стыль” звярнуўся па каментар да сталага чытача “Народнай волі”, гарадзенца Ўладзіміра Рунге:

 

– Гэта звёны аднаго ланцуга. Дадзена каманда “зачысціць” інфармацыйную прастору па ўсіх напрамках і чыноўнікі ўзяліся яе выконваць.

 

Думаю, гэта яшчэ не апошняя кропля.

 

Усё становіцца як у савецкія часы, калі не дапускалася аніякай альтэрнатыўнай думкі.

 

Крыўдна, што час ляціць так хутка, а мы топчымся на месцы…

 

Што я буду рабіць, калі зачыняць “Народную волю”?

 

Буду надалей глядзець “Белсат”, знаёмыя дапамогуць з раздрукоўкамі з інтэрнэту. Матываваны чалавек у наш час знойдзе патрэбную яму інфармацыю”.

 

 

Рашучы пратэст супраць такіх дзеянняў уладаў ужо выказала кіраўніцтва ГА “Беларуская асацыяцыя журналістаў”.

 

Па словах намесніка старшыні БАЖ Андрэя Аляксандрава:

 

«Хваля жорсткіх рэпрэсій супраць незалежных журналістаў і СМІ ў Беларусі не толькі не спыняецца — яна пераходзіць у новую фазу. Гэта выглядае на пачатак зачысткі інфармацыйнай прасторы, на якую ўлады намякалі раней і якую рыхтавалі загадзя, „абклаўшы“ гэтыя два выданні стосам папярэджанняў.

 

Мы рашуча пратэстуем супраць карных захадаў з боку Міністэрства інфармацыі. Выказваем сваю салідарнасць і падтрымку нашым калегам з „Народнай волі“ і „Нашай Нівы“. Мы разам зробім усё магчымае, каб Беларусь не страціла гэтыя свабодныя галасы, якія шмат у чым з’яўляюцца знакавымі для ўсёй нацыі. Але, баюся, што адстаяць выданні будзе немагчыма без моцнай падтрымкі з боку грамадства, якая зараз вельмі патрэбная.

 

Адметна, что цяпершаняя спроба закрыць два незалежныя выданні адбываецца на фоне негатыўных працэсаў у эканоміцы, палітычных працэсаў супраць апанентаў рэжыму, на фоне расследавання гучнай справы ад тэракце ў сталічным метро. Таму ўлады так намагаюцца задушыць свабоду слова ў краіне — бо палітыка татальнага кантролю над грамадскай думкай фактычна з’яўляецца асновай цяперашняга рэжыму ў краіне.»