210 тысяч кубоў драўніны нарыхтуюць з паламаных ветрам дрэваў на Гродзеншчыне

|

Сёлета ў пачатку лютага Гродна зачапіў ураган “Нікалас”.

Бура зламала вышку аператара сотавай сувязі “Лайф”, энергазабеспячэнне было парушана ў 431 населеным пункце Гродзенскай вобласці.

Тады моцны вецер паваліў у Гродне дрэвы на чатыры аўтамабілі, сотні зламаных дрэваў засталіся ў лясах.

 

У першай дэкадзе красавіка непагадзь зноў нарабіла на Гродзеншчыне шмат бяды.

Зноў сотні дамоў засталіся без электрычнасці, жыхарка Ліды атрымала тады сур’ёзныя траўмы ад сарванага ветрам даху на прыпынку.

У Гродне ў двары дома па завулку Парахавым вярба ўпала на дзіцячую пляцоўку, вялізнае дрэва вецер паваліў на машыну каля Румлёўскага парку.

 

Ламаў дрэвы ўраган і ў трэцяй дэкадзе ліпеня.

Падчас яго асабліва пацярпела Белавежская пушча, на Гродзеншчыне –  40-60-гадовыя сосны ў гаспадарчай зоне Поразаўскага і Новадворскага лясніцтваў.

Па папярэдніх звестках там было пашкоджана каля 1400 га лесу, на 600 га лес амаль цалкам знішчаны.

 

Начальнік вытворчага аддзелу лесагаспадарчага аб’яднання Барыс Міхайлавіч Сіліновіч:

Каля 80 тысяч кубаметраў буралому засталося толькі пасля ліпеньскага ўрагану, а калі ўлічыць яшчэ красавіцкі і лютаўскі, то  мы павінны 210 тысяч кубаметраў драўніны нарыхтаваць у гэтым годзе.

На сёння нарыхтавалі  ўжо 138 тысяч.

У апошнія гады ўраганы з-за перападаў тэмпературы здараюцца ўсё часцей.

 

Фота з сайта http://perspektiva-info.by

30-40% паламаных дрэваў ідуць на дровы, астатняе, калі хутка нарыхтаваць, прыдатнае і на піламатэрыялы, і для вытворчасці.