Шэдэўр ад гарадзенскіх культурніцкіх дзеячоў 20 мая пайшоў гуляць па сеціве і несці культуру ў масы. Паабураўшыся спачатку, інтэрнаўты сталі ва ўвесь голас смяяцца. Бо што яшчэ застаецца жыхару культурнай сталіцы, перажыўшаму культурны шок у год культуры? Пасмяемся разам з хвалі гарадзенскага гумару, што паўстала ў адказ на чыноўніцкі крэатыў.
Ноч музеяў, якую для гарадзенцаў зладзіў Музей гісторыі рэлігіі, прапанавала багатую праграму са шпацырам па горадзе і наведваннем адразу трох музеяў. Наведвальнікаў гасцінна прымалі ў турме, запрасілі пазнаёміцца з прывідамі пажарнай каланчы і пазнаёмілі з метадамі працы сярэднявечнай інквізіцыі. Разняволіцца пасля жахаў дазволіў спектакль Тэатра лялек і кава са слодычамі. Скончылася ноч канцэртам арганнай музыкі ў Фарным касцёле.
Гродзенскі тэатр лялек ужо ў каторы раз прыняў на сваёй сцэне прамяністую Ганну Хітрык і гурт S°unduk. 21 мая яны прывезлі ў Гродна свой новы альбом “Сом”, над якім музыкі працавалі цэлых тры гады. Альбом складаецца з 16 кампазіцый, падзеленых на два дыскі па 8 песень: палова на рускай мове і палова на беларускай.
З нагоды Міжнароднага дня музеяў увечары 20 мая дзверы Новага замку заставаліся адкрытымі да позніх гадзін. Гасцей чакала праграма “Сны ў майскую ноч”, натхненнем для якой быў стыль сюррэалізму і яго вялікі прадстаўнік Сальвадор Далі.
“Я учора сніў сваё падарожжа на Сатурн, раней на Месяц, ці яшчэ куды. Паўсюль на гэтых планетах жывуць людзі. І ўсе яны – выключна беларусы”. Гэтыя развагі “беларускага Цыялкоўскага”, Язэпа Драздовіча, узгадаў у размове пра новую кнігу Алесь Госцеў, аўтар манаграфіі “Вядомыя ўраджэнцы Гродзенскай вобласці”, другой кнігі з серыі пра знакамітых гарадзенцаў.
Трыццаць гадоў таму ў Гродне расчыніў дзверы музей Максіма Багдановіча. За гэты час ён стаў прыкметным культурным цэнтрам. Пра тое, як ствараўся музей і збіралася ягоная экспазіцыя, Свабода гутарыць са стваральніцай і першай дырэктаркай, паэткай Данутай Бічэль.
Госцяй на курсах “Мова нанова” ў Гродне 16 мая стала Марыя Міцкевіч – унучка адразу двух класікаў беларускай літаратуры. Яна распавяла пра сваіх дзядоў, а гарадзенскія навучэнцы прадставілі ў адказ імправізаваныя спектаклі з ўрыўкаў твораў Якуба Коласа і Янкі Маўра. У “эксклюзіўнай” частцы сустрэчы Марыя Міцкевіч адказала на пытанні пра сямейны побыт пісьменнікаў і расказала некалькі смешных жыццёвых выпадкаў з іх удзелам.
Гарадзенскі харэограф Яўген Якуш прадставіў новае відэа, у якім яго шоў-група паўстала ў вобразах сярэднявечных ведзьмаў. Сам жа танцор апынуўся ведзьмаком. Усе вобразы, па словах аўтараў, былі створаны паводле апісанняў са старажытных крыніц.
Другая тэатральная гасцёўня, што адбылася 12 мая, прайшла з невялікай колькасцю гледачоў, але ў вельмі цёплай атмасферы. Пасля прагляду трох міні-спектакляў гарадзенцы яшчэ больш за гадзіну размаўлялі з госцем імпрэзы рэжысёрам Міхаілам Лашыцкім. Як зазначыў Аляксандр Цебянькоў, адзін з арганізатараў мерапрыемства, гэтым разам гасцёўня насамрэч сабрала сапраўдных аматараў і сябраў тэатра.
У кінатэатры “Чырвоная зорка” 25 мая ўпершыню ў Беларусі пройдзе паказ фільма з цiфлакаментарыямi. Гэта каментарыі, якія паведамляюць людзям са слабым зрокам, што адбываецца на экране.
