Вясновыя вогнішчы прынеслі першыя страты: у Слонімскім раёне згарэў дом і падворак
Як паведамілі “Твайму стылю” ў прэс-службе Гродзенскага МНС, калі полымя “пабегла” па сухой траве – жанчына яго затаптала, але вогніўча пакінула дагараць, а сама пайшла прыбірацца ў доме.
Праз нейкі час адчула пах дыму, выбегла і ўбачыла, што ўжо гарыць сцяна.
У выніку распачаўся пажар, у якім згарэў дом, падворак, гаспадарчыя пабудовы і ўся маёмасць.
Сям’я у часе рамонту дома будзе жыць у сваякоў у суседняй вёсцы.
З надыходам сапраўднай вясны гаспадары пачалі прыборку прысядзібных участкаў і часам забываюцца, што спальванне смецця і выпальванне травы – не толькі парушэнне супрацьпажарнай бяспекі і прыродаахоўнага заканадаўства, але і пагражаюць самім людзям.
Паводле арт.20 Закона РБ “Пра раслінны свет” выпальванне сухой расліннасці і яе рэшткаў забаронена.
Паводле арт.15.57 КАП РБ парушальнікам пагражае штраф у памеры ад 10 да 40 базавых велічынь. Калі парушэнне прывяло да стратаў у асабліва буйным памеры, наступае крымінальная адказнасць (арт.270, 276 КК РБ).
Варта памятаць, што з-за палаў не толькі гінуць насякомыя, птушкі, расліны, дэградуе глеба, але і здараюцца пажары.
Да таго ж гарадская трава ўтрымлівае солі цяжкіх металаў, а на вёсцы могуць гарэць рэшткі ўгнаенняў і пестыцыдаў, небяспечнае смецце.
Такі дым небяспечны для здароўя чалавека.
Экалагічнае таварыства “Зялёная сетка”, грамадская арганізацыя “Экадом”, Цэнтр экалагічных рашэнняў, міжнароднае грамадскае аб’яднанне “Экапартнёрства”, эколага-краязнаўчае грамадскае аб’яднанне “Неруш” і Беларускае таварыства Чырвонага крыжа распачалі новы этап штогадовай інфармацыйнай кампаніі, накіраванай на ліквідацыю выпальвання сухой расліннасці і спальвання побытавага смецця.
Кампанію падтрымалі Міністэрства прыродных рэсурсаў і аховы навакольнага асяроддзя і Міністэрства па надзвычайных сітуацыях Рэспублікі Беларусь.
Здымкі і відэа http://www.gs.by, http://112.by