Як зберагчы ровар ад злодзеяў: парады міліцыі і раварыстаў
Сёлета злодзеі актывізаваліся з канца красавіка.
Калі ў сельскай мясцовасці крадуць “Аісты” беларускай вытворчасці, то ў Гродне ў асноўным знікаюць дарагія імпартныя мадэлі. Чужыя ровары здабываюць пераважна дзеля продажу і прадаюць за кошты ў два разы ніжэй за рэальныя, таму парада законапаслухмяным грамадзянам – не набываць тэхніку ў малазнаёмых людзей і без дакументаў.
У горадзе ровары знікаюць у асноўным з пад’ездаў, калі гаспадары пакідаюць іх на лесвічнай пляцоўцы, некаторыя нават не прышпіліўшы тросік.
Адзін з апошніх выпадкаў здарыўся на Дзевятоўцы, калі кампанія святкавала дзень народзінаў у кватэры другога паверху. Адзін з гасцей падняўся на паверх вышэй, убачыў на пляцоўцы добры ровар, узяў яго і паехаў дамоў.
Андрэй Сакалоў раіць не пакідаць ровары без нагляду, у пад’ездах – толькі ў скрайнім выпадку, і абавязкова карыстацца тросікамі, ланцужкамі і добрымі веласіпеднымі замкамі. А лепш за ўсё хаваць тэхніку ў тамбуры альбо падвал.
З пачатку лета не атрымліваецца адшукаць больш за 50 скрадзеных веласіпедаў.
Сярод злодзеяў – і дзеці, і дарослыя, некаторыя трапляліся міліцыі па некалькі разоў. Так, у Ленінскім раёне Гродна 12-гадовы хлопчык скраў два ровары, а два вучні ліцэя 1995 і 1996 гадоў нараджэння паспелі скрасці чатыры. У Лідскім раёне вучні восьмага класа здзейснілі тры крадзяжы, у Мастоўскім – мужчына без пэўнага месца жыхарства скраў два ровары.
50 скрадзеных за апошні месяц на Гарадзеншчыне веласіпедаў так і не знайшліся.
Як лепш засцерагчыся ад злодзеяў, гарадзенскія веласіпедысты абмяркоўваюць на форуме.
votodef раіць:
– Захоўваць дакументы на ровар і памятаць, што, набываючы яго без дакуметаў, рызыкуеш стаць гаспадаром скрадзенага транспартнага сродка.
– Пажадана сфатаграфаваць свой ровар і запомніць асаблівыя прыкметы (налепкі, драпіны і г.д.), – у выпадку крадзяжу гэта дапаможа ў пошуку.
– Самы надзейны спосаб абараніцца ад крадзяжу – не пакідаць ровар без нагляду.
– Нават калі адыходзіце на некалькі хвілін, скарыстайцеся велазамком і пакідайце машыну ў такім месцы, каб яе можна было бачыць з вакна, а хутказдымнае абсталяванне варта забіраць з сабой. Яшчэ лепш, каб “стаянка” ровара праглядалася камерай відэаназірання.
– Ровар варта прыкоўваць за кола і раму, а лепш – за абодва кола і раму.
Большасць інтэрнаўтаў-раварыстаў сыходзіцца на тым, што замок злодзеяў не спыніць, асабліва калі ровар крадуць на продаж, але больш надзейнымі лічацца дарагія замкі тыпу U–lock і калёныя ланцугі. Тросікі і ланцужкі з будаўнічых крамаў, “дапамогуць толькі ад алкашоў і іншых выпадковых мінакоў”, піша NickPC.
У любым выпадку, ад складанасці замка залежыць толькі час, неабходны на яго адмыканне, а ў некаторых выпадках злодзеі не спыняюцца ні перад чым: у ноч з 5 на 6 чэрвеня злачынца параніў сабаку-ахоўніка і ўсё ж скраў з-пад вокнаў прыватнага дома ТrekNavigator 2000.
Калі ровар усё ж скралі:
– Адразу звяртайцеся ў міліцыю.
– Запомніце час крадзяжу, пастарайцеся знайсці сведкаў.
– Вам спатрэбіцца пашпарт, дакументы на ровар, яго фотаздымкі і апісанне.
– Інфармацыю пра зніклы ровар размясціце ў адпаведнай тэме на форуме і распаўсюдзьце сярод сяброў-веласіпедыстаў.
– Праглядайце абвесткі пра продаж карыстаных ровараў.
– Калі адшукаеце свой веласіпед самастойна, не спрабуйце яго адабраць – адразу выклікайце міліцыю.
Здымак retroradio.hu