Грыбнікоў папрасілі не хадзіць у лясы каля Гожы: будуць страляць

|

Беларускія вайскоўцы і тэхніка пачалі прыбываць ужо з пачатку тыдня.

Вайскоўцы размесцяцца ў палявых лагерах. Прыедуць міністры абароны краін, што ўваходзяць у АДКБ, і назіральнікі з НАТА.

Самі вучэнні пройдуць у перыяд з 20 да 26 верасня, яшчэ 2 тыдні зойме падрыхтоўка да іх.

Таму з 9 па 26 верасня на Гожскім палігоне паблізу пасёлка Крынічнае баявая стральба будзе весціся штодня.

У сувязі з гэтым уводзіцца забарона на наведванне лясоў у гэтым раёне.

 

У вучэннях задзейнічаюць каля 900 рэзервістаў з Гарадзенскай вобласці.

Яны атрымліваюць форму і рыштунак і выправяцца на палігон разам з салдатамі.

На зборы прызвалі мотастралкоў, артылерыстаў, танкістаў, зенітчыкаў, сувязістаў і мінамётчыкаў.

 

На першым этапе вучэнняў адпрацуюць кіраванне прымянення рэгіянальнай групоўкі войск Саюзнай дзяржавы, кіраванне ў часе разгортвання, блакіравання раёнаў дзеянняў незаконных узброеных фарміраванняў, нарошчвання групоўкі ВПС і СПА дзеля выключэння нанясення ўдараў з паветра.

На другім этапе кіраванне войскамі будзе адпрацоўвацца на палігонах.

 

Вайскоўцы падкрэсліваюць, што вучэнні маюць абарончы характар, які адпавядае палажэнням вайсковых дактрын Беларусі і Расіі.

 

Сумесныя беларуска-расійскія вучэнні праводзяцца раз на 2 гады. Апошнія прайшлі ў верасні 2011 года ў Ніжэгародскай вобласці.

 

Здымак www.ohranka.com