Алесь Дзянісаў заспявае супраць смяротнага пакарання

|

Акрамя Дзянісава, супраць смяротнага пакарання ў “Апошнім золку” выкажуцца Лявон Вольскі, Ганна Хітрык, Зміцер Вайцюшкевіч, Аляксандр Памідораў, Наста Шпакоўская і Віктар Рудэнка.

Падрабязнасці праекта, прэзентацыя якога плануецца на пачатак кастрычніка, яго стваральнікі пакуль не раскрываюць.

 

Як распавёў “Твайму стылю” каардынатар “Апошняга золку” журналіст і прадусар Сяргей Будкін, дакладна вядомая толькі назва і склад удзельнікаў.

Праца над сцэнаром яшчэ не скончаная, – у якім фармаце выйдзе праект, будзе ясна праз тыдзень-другі.

Ён працягне традыцыі знакамітага “Народнага альбома”, праектаў “Я нарадзіўся тут” і “Сьвяты вечар”.

 

Алесь Дзянісаў:

Я заспяваю песню, якую напісаў даўно. Яна супраць смяротнага пакарання, але не звязаная ні з якімі канкрэтнымі падзеямі.

У яе і назвы тады не было, напісаў і паклаў на паліцу.

А выклаў яе падчас падзей, звязаных з судом і расстрэлам гэтых хлопцаў (Канавалава і Кавалёва – К.К.), падзей, да якіх у мяне засталося шмат пытанняў.

Цяпер гэтая песня называецца “Калі ты націскаеш на спуск”.

 

Другую кампазіцыю Дзянісава папрасілі напісаць спецыяльна для праекта.

Гэта песня “1937”: музыка Алеся Дзянісава, словы – у суаўтарстве з Дзянісам Жыгаўцом.

 

А.Д.:

Далі на выбар пару тэматаў.

Я выбраў тэмат сталінскіх рэпрэсій, як сімвал рэпрэсій у Савецкім Саюзе, бо не падзяляю рэпрэсіі на “ленінскія”, “сталінскія”, “хрушчоўскія”. Яны мелі розныя маштабы, але людзей забівалі і да, і пасля 1937 года.

Песня “1937” пра тое, як шмат нявінных людзей расстралялі.

 

Па задуме аўтараў “Апошняга золку”, кожны музыка-удзельнік праекта распавядзе пра адзін са спосабаў смяротнага пакарання.

Стваральнікі праекта спадзяюцца, што такім чынам змогуць прыцягнуць больш увагі да актуальнай для Беларусі тэмы.

Наша краіна застаецца адзінай краінай у Еўропе, дзе людзей караюць смерцю.