“Ведаць” альбо “не ведаць”: наколькі беларусы валодаюць ангельскай мовай

|

align=”left” alt=”Надзея Кацуба” >Надзея Кацуба, урач

Беларусы, на жаль, не ведаюць не толькі ангельскай, нямецкай, французскай, італьянскай, кітайскай і іншых моў, але і беларускай. Замежную мову я пад  кіраўніцтвам бацькоў вывучала ў школе, потым у каледжы, ва ўніверсітэце. Нейкі час вывучала паглыблена на платных курсах. Але праз гады, я ўсё роўна разумею, што замежнай мовы я не ведаю. Чаму? Можа, справа ў адсутнасці матывацыі яе вывучаць?

 

У кожнага свая прычына і свае апраўданні, але адно магу сказаць дакладна: пераважная большасць людзей не ведалі, не ведаюць і не хочуць ведаць ніводнай замежнай мовы.

 

А той хто жадае вывучыць, той знойдзе магчымасць і ў школе, і самастойна седзячы за слоўнікамі, і ў інтэрнэце, маючы зносіны з носьбітамі моў па Скайпе і г.д. Галоўнае – матывацыя. Бо калі мне заўтра скажуць, што мяне перапраўляюць працаваць урачом у Англію, то, не гледзячы ні на што, за месяц я вывучу ангельскую мову.

 

Ірына Малашка, турагент

 

Канешне, не ўсе ведаюць дастаткова добра ангельскую мову, нехта ўвогуле яе не ведае, але матывацыя дзеля яе вывучэння ёсць. Такой матывацыяй можа быць добрая высокааплочваемая праца, магчымасць чытаць любімыя кнігі на замежнай мове, разуменне замежнай музыкі і шмат  чаго іншага. Вывучаць мову можна ў школе, ва ўніверсітэце, з рэпетытарам, самастойна па відэа/аўдыя заняткам, на курсах і з бацькамі. Кошт пытання залежыць ад кожнага чалавека. Кожны сам вырашае, колькі ён можа плаціць за атрыманне ведаў.

 

Святлана Ганчар, выкладчык

 

Беларусы, на жаль, яшчэ не вельмі ведаюць ангельскую мову. Паразмаўляць на вуліцы з замежнікам было б для большасці праблемай. Але перыядычна беларусаў апаноўвае жаданне яе вучыць. З досведу ведаю, што калі людзі маюць матывацыю іншую, чым “з’ехаць жыць у Лондан/Штаты/Канаду”, то яны астываюць да заняткаў вельмі хутка.

 

Толькі ў Гродне штук пяць моўных школ і курсаў, якія прапануюць ангельскую на кожным узроўні і для ўсіх узростаў. Мяркуючы па тым, што яны “жывыя”, можна сказаць, што нашыя суайчыннікі не безнадзейныя ў сваіх патугах навучыцца ангельскай.

 

Кошт пытання? Усё залежыць ад узроўню адукацыі, колькасці навучэнцаў, эфектыўнасці ведаў. Я лічу, што ў Гродне кожны зможа знайсці месца, якое будзе падыходзіць яму як па кішэні, так і па асабістым раскладзе жыцця.

 

Ганка Барадзіна, выкладчык

 

Беларусы яшчэ не вельмі ведаюць ангельскую, але цешыць, што да іх пачало даходзіць, што яе вучыць трэба. Пакуль яшчэ жаданне вывучаць замежныя мовы ў людзей не супер, бо жывая яшчэ савецкая школа, у якой мы павінны былі вучыць мову адзінаццаць год у школе, а потым яшчэ два-тры гады ва ўніверсітэце. Вынік за гэты час звычайна такі, што нашыя людзі ўмеюць толькі разважаць “тэмамі”.

 

Мову можна вывучаць на курсах. Напрыклад, тры разы ў тыдзень у суполцы за пяць месяцаў магчыма асвоіць нейкі ўзровень валодання мовы. Яшчэ варыянт вывучаць мову з рэпетытарам. Такі метад часцей за ўсё выкарыстоўваюць людзі, якім патрэбна ў вельмі кароткі час вывучыць нейкі пласт мовы.

 

Мову можна вучыць па адукацыйных сайтах ці знайсці чалавека, так званага носьбіта мовы, і размаўляць з ім.

 

Кожны чалавек павінен разумець, дзеля якой мэты ён імкнецца вывучыць мову. Калі няма нагоды і атрыманыя веды не будзе дзе выкарыстаць, дык такое вывучэнне мала вартае і поспехаў мець не будзе.

 

Цешыць, што ўсё больш і больш людзей ужо або ведаюць, альбо хоць разумеюць ангельскую. Мова – сродак зносін, і людзі, асабліва калі пачынаюць актыўна падарожнічаць, пачынаюць разумець гэта і вучыць яе.

 

Станіслаў Рачкель, студэнт

 

Беларусы ведаюць ангельскую мову дрэнна, таму што большасць з іх ніколі не была за мяжой. Матывацыя дзеля вывучэння ў нас таксама дрэнная: адсутнасць Балонскай сістэмы і частковая закрытасць нашай адукацыі робяць свае справы. Наконт адукацыі: шмат патрэбнай і  цікавай літаратуры выдаецца на замежных мовах, а пакуль яе перакладуць на рускую ці беларускую – актуальнасць і навізна можа знікнуць.

 

Мовы магчыма вывучаць у прыватных фірмах, іх хапае, але я не ведаю, які там узровень выкладання. Яшчэ можна вывучаць на курсах пры ўстановах адукацыі. Кошт пытання істотны, бо я, напрыклад, студэнт, які сам аплочваць курсы пакуль не можа, за мяне плацілі б бацькі. Яшчэ для мяне вострае пытанне – магчымасць выкарыстаць атрыманыя веды.

 

Улляна Ерыксонава, студэнтка

 

Я б не сказала, што вялікая частка беларусаў ведае ангельскую мову, роўна як і кожную іншую замежную мову. Толькі некаторыя людзі, праца ці навучанне якіх звязана з ангельскай, могуць сказаць, што сапраўды ведаюць яе.

 

У той жа час, абсалютная большасць можа без асаблівых праблем чытаць, скажам, артыкулы ў інтэрнэце са слоўнікам ці чыёй-небудзь дапамогай. Нейкія веды так ці інакш прысутнічаюць.

 

Праз адсутнасць часу/сіл/грошай ці па іншых прычынах, вывучаць ангельскую мову імкнуцца людзі, для якіх гэта пытанне прафесійнай дзейнасці ці навучання. Ёсць яшчэ  жменька людзей, якія імкнуцца да самаразвіцця.

 

Вывучыць мову можна ў англамоўным асяроддзі. Самы пашыраны варыянт – курсы. Яшчэ ёсць падручнікі, але гэта надта складана: няма кантролю, а трэба самадысцыпліна, таксама не заўсёды можна зразумець самастойна граматычныя правілы і асаблівасці іх ужывання. Тым больш, ніхто не гарантуе карэктнасць вашага вымаўлення, а гэта важна.

 

Таццяна Ерыксонава, пенсіянерка

 

Беларусы ведаюць ангельскую мову вельмі дрэнна. Маладыя імкнуцца яе вывучаць толькі на 15% і толькі как зарабляць грошы, а не дзеля развіцця інтэлекту.

 

Моўныя азы можна атрымаць толькі з тым, хто ёй добра валодае. Лепш за ўсё з носьбітам мовы. Ідэальны варыянт – спецыяльная школа. Кошт пытання залежыць ад узроўню адукацыі і глыбіні ведаў, якія навучэнцы могуць  атрымаць.

 

Меркаванні апытаных гарадзенцаў не зусім радасныя. Але Беларусь з цэнтру Еўропы нікуды не дзенецца і, хто ведае, можа калісці мы і загаворым па-ангельску так, як сёння размаўляем па-руску.

 

Дзе ў Гродне можна вывучыць ангельскую мову? Карэспандэнтка “Твайго стылю” сабрала адрасы адукацыйных устаноў на мапе ніжэй. Калі вы ведаеце яшчэ іншыя месцы, дзе можна вывучыць ангельскую – чакаем на вашыя каментары!