Футбольны “Нёман” стартуе гульнёй са “Слуцкам”

|

Першую сустрэчу сёлетняга чэмпіянату краіны па футболе нашая каманда згуляе 28 альбо 29 сакавіка на сваім полі. Так вырашыла лёсаванне, праведзенае 11 лютага ў Беларускай федэрацыі футбола.


Супернікам “Нёмана” будзе каманда, якая ніколі раней не гуляла ў вышэйшай лізе беларускага футболу.

 

Цікава, што спонсарамі абедзьвух каманд у мінулым сезоне з’яўляліся цукровыя заводы (Скідзельскі і Слуцкі). Таму можна казаць пра своеасаблівае “салодкае дэрбі”, якое чакае гарадзенскіх заўзятараў.

 

У складзе “Слуцка” гарадзенцы могуць убачыць і добра ім знаёмага раней па выступах за “Нёман” абаронцу Андрэя Горбача (на здымку ніжэй), які гэтай зімой перайшоў у склад дэбютантаў вышэйшай лігі з “Дняпра”.

 

Гульню другога тура гарадзенцы згуляюць у гасцёх 5 альбо 6 красавіка супраць мінскага “Дынама”.

 

У мінулым сезоне “Нёман” выйграў у гэтай каманды 3 гульні з чатырох і таму супернікі маюць на хлопцаў Сяргея Саладоўнікава асаблівы “зуб”.

 

Зараз гарадзенцы знаходзяцца на зборы ў Турцыі. Увечары 11 лютага яны згуляюць з варонежскім “Факелам” з другой лігі чэмпіянату Расіі.

 

На здымку: Шар з нумарам “Нёмана” у час лёсавання выцягнула прадстаўніца гарадзенскага футбольнага фан-сектару Вольга Трафімовіч.

 

Фота: kick-off.by і sfc-slutsk.by