Вуліцу Пушкіна зробяць на 800 метраў даўжэй

|

Дарога пачнецца ў месцы перасячэння вуліц Дубко і Пушкіна, пройдзе паміж новым будынкам Ленінскага РАУС і раддомам і выйдзе на перакрыжаванне з вуліцай Курчатава ў раёне запраўкі і “Малочнага Міра”.

 

Па словах галоўнага інжынера праекта інстытута “Гроднаграмадзянпраект” Уладзіміра Гарноўскага, новы участак дарогі даўжынёй каля 830 метраў будзе чатырохпалосным і пройдзе паралельна вуліцам Горкага і Дзяржынскага. 

 

Падчас будавання рэканструююць усе перакрыжаванні вуліцы Пушкіна з Дубко, завулкам Дзяржынскага і Курчатава. У прыватнасці, на першым перакрыжаванні зробяць дадатковую паласу для паварота з Пушкіна на Дубко.

 

Таксама пашыраць праезжую частку на перасячэнні Пушкіна-Курчатава, тут у кожным накіраванні дададуць поласы для паварота направа з вуліцы Курчатава. Акрамя таго, на кожным скрыжаванні з’явяцца рэгулюемыя светлафорамі пешаходныя пераходы з астраўкамі бяспекі. 

 

На новым участку вуліцы з’явяцца чатыры прыпынкі, адзін з іх – каля будынку РАУС, і бясплатныя паркоўкі больш чым на 100 месцаў. На тратуарах з абодвух бакоў прадугледзяць месца для веладарожак.

 

Будаваць новую дарогу будуць у два этапы: спачатку ад вуліцы Дубко да завулка Дзяржынскага, пасля ад завулка да Курчатава. Па словах першага намесніка старшыні гарвыканкама Барыса Фёдарава, работы павінны пачацца ўжо ў гэтым годзе.