Фотакур’ёз: банк “БелВЭБ” шукае эканаміста, у абавязкі якога ўваходзіць “легалізацыя прыбытку атрыманага злачынным шляхам”

|

Выключна рэдкі спецыяліст патрэбен банку “БелВЭБ” на пасаду вядучага эканаміста ў гродзенскім аддзяленні. Сярод асноўных функцый будучага работніка дэпартамента суправаджэння кліенцкіх аперацый пазначана і такая: легалізацыя прыбытку атрыманага злачынным шляхам. “Крымінальная” вакансія размешчана на афіцыйным сайце банка. Onliner.by даведаўся ў работнікаў “БелВЭБа”, як такое магло адбыцца. 


Зарплата вядучага эканаміста ў вакансіі не пазначаная, у адрозненне ад спецыфічнага навыку – легалізоўваць злачынныя даходы. Акрамя гэтага, кандыдату трэба ўмець выконваць вельмі звычайныя функцыі: весці рахункі юрыдычных асоб, спраўджваць касу, залічаць зарплату і гэтак далей.

 

Onliner.by звязаўся з супрацоўнікамі «БелВЭБ», каб даведацца аб вакансіі пабольш.

 

Мы ў курсе гэтага інцыдэнту, цяпер усё будзе выпраўлена. У дадзены момант мы высвятляем, чаму з апісання вакансіі прапала адно слова. Афіцыйнага каментара па гэтым пытанні мы не даем, – адказалі нам.

Сапраўды, ужо праз некалькі хвілін на афіцыйным сайце банка памянялі асноўныя функцыі гродзенскага вядучага эканаміста. Цяпер у абавязкі спецыяліста ўваходзіць «прадухіленне легалізацыі сродкаў, атрыманых злачынным шляхам».