Друскенікі – там, дзе перастаеш спяшацца

3 лютага 2015 Ксенія Паляньска |

Пагляд

Сёння гэтае невялікае мястэчка ў паўднёвай частцы Літвы вядомае як адзін з найлепшых курортаў у Еўропе.

З даўніх часоў людзі прыязджаюць сюды адпачываць і лячыцца у санаторыі.

З нядаўняй пары папулярным месцам для гасцей стаў таксама сучасны аквапарк, які прываблівае мноствам атракцый.

З Друскенікамі звязана гісторыя многіх славутасцяў.

Напрыклад, Юзаф Пілсудскі сканчаў тут працу над сваёй кнігай “1920 год”. Тут у 1924 г., падчас знаходжання на курорце пазнаёміўся з лекаркай Яўгеніяй Лявіцкай, з якой сябраваў доўгія гады.

Друскенікі прапануюць сёння шматлікія паслугі, звязаныя з аховай здароўя, а таксама прывабліваюць цікавай архітэктурай і помнікамі.

Вялікім козырам горада з’яўляюцца вялізныя паркі і лясы, якія ствараюць цудоўныя ўмовы для шпацыраў.

Хаця ідэальным сезонам, які спрыяе шпацырам па лясах, з’яўляецца вясна і лета – калі навокал шмат зялёнага, зімовая аўра таксама надае гораду непаўторнай атмасферы.

Сапраўднасць прыроды можна таксама адчуць, шпацыруючы ўздоўж марудна нясучага свае хвалі Нёмана.

Адным з цікавых помнікаў з’яўляецца блакітна-белая царква ў Гонар Абраза Прасвятой Багародзіцы Усіх Смуткуючых Радасць.

Невялікі храм, дзякуючы палітры і багатым аздабленням прыцягвае асаблівую ўвагу турыстаў.

Тое ж можна сказаць і пра неагатычны Касцёл Маці Божай Шкаплернай.

Аднак найбольшую адмсетнасць Друскенікам надаюць старадаўнія драўляныя дамы.

Гэтыя чароўныя па сваім выглядзе пабудовы нібы пераносяць у думках у іншую эпоху.

Напэўна як і іншым людзям, мне падабаецца шукаць параўнанні паміж рознымі гарадамі. Друскенікі сваёй драўлянай архітэктурай нагадалі гарадзенскія вілы Новага Свету і яшчэ – Сопат – польскі горад, які ляжыць на Балтыйскім моры.

Другая асацыяцыя прыйшла ў галаву не толькі з-за архітэктуры 19-20 стагоддзяў у альпійскім стылі, але таксама таму, што абодва гарады – тыповыя невялікія курорты, якія ахвотна наведваюцца многімі турыстамі.

У Друскенікі прыязджаюць найперш турысты з Беларусі, Польшчы і Расіі. Калі шпацыраваць вулкамі горада або рабіць пакупкі ў супермаркеце, пачуць можна збольшага рускую мову. Але прысутнасць турыстаў не парушае аўры горада, таму што ў Друскеніках уражвае спакой.

Той, хто ў выходныя шукае моцных уражанняў, павінен абраць іншае месца. У Друскенікі варта прыехаць, каб cупакоіцца, адпачыць ад мітусні вялікіх гарадоў.