“Как тут клево!” – расійскія відэблогеры завіталі ў Гродна
Яшчэ не даехаўшы да Гродна, расійцы пачалі наракаць, што ім тут “смярдзіць птушкафабрыка, завод медпрэпаратаў і цукровы завод”. “Смурод рэальна пякельны”, – заўважыў Андрэй Ніфёдаў.
“Залятаем у Гродна. Я чакаў пабачыць маленькі гарадок тыпу Траецкага (прадмесця – рэд.) на Нямізе, але тут даволі вялікі горад адгрохалі”, – падзяліўся адзін з расійскіх падарожнікаў.
У сталоўцы, якую Ніфёдаў назваў “саўдэпаўскаю”, яму прапанавалі двайную порцыю яйка ў халадніку, бо той не хацеў смятаны. “У Расіі я б такога не пачуў, гэта ўнікальны народ”, – падкрэсліў блогер, адзначыўшы, што беларусы таксама спакойна рэагуюць, калі іх здымаюць на камеру. Дзівіліся расійцы таксама малым беларускім коштам у параўнанні з расійскімі.
Наведалі турысты з-за ўсходняй мяжы і Аўгустоўскі канал. “Вельмі прыгожыя, маляўнічыя месцы. Літаральна супакойваюць… На шашлык прыязджаць – лепей не прыдумаеш”, – скаментавалі госці з Расіі.
“Як тут клёва, – каментавалі падарожнікі на вуліцы Савецкай у Гродне. – Але яна хутчэй не савецкая, а еўрапейская”. Тут яны пакаштавалі некаторыя беларускія стравы: жур і мачанку. Беларуская ежа ім спадабалася, праўда, каларытныя назвы выклікалі ў іх неўразуменне. “Мне не падабаецца назва “мачанка” – мачавіну нейкую нагадвае”, – каментаваў Андрэй Ніфёдаў. Часам аднак расейцы спрабавалі прамаўляць, на іх думку, па-беларуску, але іх вымаўленне больш нагадвала ўкраінскае. Ніфёдаў пахваліўся веданнем дзвюх беларускіх словаў: бусел і бульба.
“Люблю Беларусь”, – напісаў расійскі блогер пад відэа. “Хачу жыць у Беларусі”, – каментавалі інтэрнаўты з Расіі. “Стаўце лайкі за тое, што Ніфёдыч пабываў у культурнай сталіцы Беларусі – Гродне”, – выказаўся адзін з жыхароў гарадзенскага мікрараёну Дзевятоўка.