Дзяўчыны з форума сабралі для дзіцячага дому касметыку, вопратку і шмат прысмакаў (Duplicate) 2

|

Парэчча многім вядома дзякуючы санаторыю, дзіцячым летнікам і Малочнаму возеру. Але не ўсе ведаюць, што там ёсць яшчэ і дапаможная школа-інтэрнат, для выхаванцаў якой сям’я – гэта іх выхавацелі і яны самі адзін для аднаго. Пра дапамогу дзеткам піша чытачка “Твайго стылю”.


У суботу, 3 кастрычніка, у выхаванцаў Парэцкай школы-інтэрната пабывалі госці з Гродна. Сам прыезд гасцей ужо быў радасцю для дзетак, чые кола сяброў і знаемых абмежавана сценамі інтэрната.

 

З чаго ўсё пачалося? З гарадзенскага форуму! Фарумчанкі, актыўныя ўдзельніцы раздзелу “Прыгажосць, стыль і мода”, вырашылі дапамагчы дзеткам. Асноўнай мэтай акцыі дзяўчыны выбралі развіццё ў дзяцей звычкі да гігіены і дагляду за сабой, знаёмства з касметычнымі прадуктамі, аб якіх у інтэрнатах дзеці ведаюць мала. Бо сярод іх не толькі малыя, але і падлеткі, для якіх гэта асабліва актуальна.

 

Ахвотных дапамагчы было шмат, і была сабраная велізарная колькасць касметыкі: сродкі па дагляду за валасамі, целам і тварам, гігіенічныя прыналежнасці. Дзяўчынкі з тэмы “Лакі (сродкі) для пазногцяў” падрыхтавалі для старшакласніц цэлыя наборы для дагляду за ручкамі і манікюру.

 

На радасць дзецям сабралі розныя гульні і спартыўны інвентар, канцылярскія прыналежнасці, кнігі. Дзяўчынкі атрымалі калготкі, шалікі, спаднічкі, расчоскі, упрыгожанні, хлапчукі – usb-флэшкі, навушнікі і многае іншае. У дадатак да падарунку кожнае дзіця атрымала прысмакі.

Для дзяцей падрыхтавалі не толькі падарункі, але і невялікае свята. Сапраўдным сюрпрызам для дзяцей было з’яўленне клоўна Шурыка! Ён здолеў развесяліць, рассмяшыць і ўцягнуць у гульні нават самых сціплых і сарамлівых дзяцей! Да дзяцей прыязджалі і дзяўчаты з групы “Мадэрн”, якія выступілі перад дзецьмі з танцавальнымі нумарамі і зладзілі невялікую дыскатэку разам з імі.

Дзеці з такім цяплом і радасцю ішлі да сваіх гасцей! Ім хацелася і проста патрымацца за рукі, усміхнуцца, пабыць побач. Бо выхаванцам інтэрната даволі рэдка даводзіцца пагутарыць з людзьмі, якія жывуць па-за межамі іх вялікага агульнага дома.

 

Дзіўныя дзеці! Малыя з такой радасцю даставалі з пакетаў цацкі, размахвалі імі ў паветры, прыціскалі да сябе, потым беглі дзяліцца прысмакамі з выхавацелямі і адзін з адным. Старэйшыя дзеці, як у шматдзетных сем’ях, прыглядаюць за малодшымі, клапоцяцца пра іх. Прыкметна, што выхавальнікі для іх значна больш, чым проста выхавальнікі. А гасцей, якіх яны бачылі ўпершыню, праводзілі як блізкіх сяброў, дорачы на развітанне цяпло сваіх дзіцячых далонек і цёплыя шчырыя ўсмешкі.

 

Кожнае дзіця, у якога няма бацькоў, марыць мець сям’ю, і гэта менавіта тое, што можа змяніць іх жыццё. А кожны з нас, дарослых, калі не ў сілах змяніць жыццё такіх дзяцей, то можа зрабіць нейкі свой унёсак, каб зрабіць яго хаця б трошкі радасней і лепш!

 

Даведацца больш аб Парэцкай дапаможнай школе-інтэрнаце і магчымасці аказання дапамогі дзецям можна на іх сайце poreche-schi.grodno.unibel.by ці па тэлефонах 993-138, 993-131.

 

Фота аўтаркі