Праваслаўныя манахіні ў Гродне галасавалі з пашпартамі СССР

|

Трынаццаць жанчынаў з гарадзенскага праваслаўнага манастыра Раства Багародзіцы – адзінаццаць манахіняў і дзве выхаванкі Слонімскай духоўнай вучэльні – не засталіся ў баку ад выбараў. На раённы ўчастак, праўда,манахіняў аніхто не выпусціў, таму прадстаўнікі выбаркаму са скрынкай у суправаджэнні міліцыянта завіталі ў манастыр.

Першай прагаласавала сама настаяцельніца матушка Гаўрыіла. Бюлетэнь у скрынку яна апусціла са словамі: «Ад дабра дабра не шукаюць». Далей матушка запрашала манахіняў заходзіць па чарзе.

Найстарэйшая з усіх, хто галасаваў, манахіняў Марыя мае 86 гадоў, у манастыры яна – з 1956-га года. Цікава, што жанчына дагэтуль мае пашпарт СССР і прынцыпова не хоча ад яго пазбаўляцца – «з перакананняў» – як патлумачыла матушка. Па гэтым пашпарце манахіня атрымлівае пенсію, па ім жа і галасуе.

 

Цікава, што «перакананых» манахіняў з пашпартамі СССР аказалася некалькі. Зрэшты, пашпарты няіснай дзяржавы сёлета нікому не перашкодзілі аддаць голас.

 

Пакуль манахіні яшчэ заканчвалі працэдуру, матушка выйшла пагутарыць з журналістамі ўжо на двары манастыра:

 

«Мы ўсе адзінагалосна прагаласавалі за Аляксандра Рыгоравіча, бо ён хрысціянін. Таму ў нашай краіне пануе мір. Мы не чуем чалавечых пакутаў, не чуем бомбаў – таго, што адбываецца ў нашага брацкага народу».

Напрыканцы настаяцельніца пажадала Аляксандру Лукашэнку «многія лета», зазначыўшы: «Хай ваш народ будзе паслухмяным і слухае вас!»