Крытычная маса блакавала рух на плошчы Тызенгаўза

Каля ста веласіпедыстаў некалькі хвілін па колу каталі свае ровары праз пешаходныя пераходы ад плошчы Тызенгаўза да парка Жылібера. Так уладальнікі двухкалёснага транспарту прадэманстравалі сваё выконванне правіл дарожнага руху.


Традыцыйна ў апошнюю пятніцу кожнага месяца веласіпедысты сусветнага руху “Крытычная маса” праводзяць акцыі ў абарону сваіх правоў. Гэтым разам аматары ровараў збіралі подпісы пад лістом да кіраўніка гарвыканкама Барыса Казялкова. Гарадзенскія веласіпедысты просяць у кіраўніка горада размежаваць пешаходную і веласіпедную зоны на ходніках (калі адсутнічае асобная веласіпедная дарожка, менавіта па іх мусяць ехаць ровары) і абсталяваць велапаркоўкі. У праектах новых аўтатрас раварысты прапануюць адасобіць веладарожкі ад пешаходных і аўтамабільных зон.

 

– Пры разглядзе пытання аб стварэнні веласіпеднай інфраструктуры горада просім Вас улічваць думку гараджан, – пішацца ў звароце да Барыса Казялкова. – З гэтай мэтай неабходна правесці сустрэчу ці шэраг сустрэч для абмеркавання пытанняў, па якіх накірунках веласіпедныя дарожкі будуць найбольш запатрабаваны, з прыцягненнем галоўнага архітэктара горада і дарожных службаў.

 

Нагадаем, на папярэдняй акцыі ўдзельнікі “Крытычнай масы” падпісваліся пад лістом да начальніка ДАІ, патрабуючы дазволу перасоўвацца па праезджай частцы. У мінулым месяцы дарожная аўтаінспекцыя праводзіла прафілактыку ДТЗ з удзелам веласіпедыстаў. Ахоўнікі бяспекі на дарогах канстатавалі найбольш распаўсюджаную памылку веласіпедыстаў – рух па праезджай частцы пры наўнаўсці ходнікаў. Тады аматары двухкалёснага транспарту масава атрымлівалі штрафы (0,5 базавай велічыні) за язду побач з аўтамабілямі.

Больш здымкаў з акцыі “Крытычнай масы” – у новай серыі фотагалерэі ТС .

Хрысціна Марчук

Фота аўтара