90-я forever! “Банда на Тэчыках” абстрэльвае маршруткі ў Навагрудскім раёне
– Бяcпраўе ў гэтых раёнах квітнее, нелегалы выцясняюць усіх, “выкашмарваюць” нашых вадзіцеляў, а сябе групоўка называе “Бандай на Тэчыках”, – распавядае AutoGrodno.by перавозчык, чый аўтамабіль абстралялі ў мінулы панядзелак.
– Па напрамку “Мінск-Навагрудак-Гродна” адпраўляе свае аўтамабілі некалькі легальных перавозчыкаў. Мясцовым жа кіроўцам, якія ніяк не зарэгістраваныя, такая сітуацыя не падабаецца, – кажа суразмоўца. – Яны пагражаюць кіроўцам ўсіх легальных перавозчыкаў і нападаюць на нашы аўтамабілі. Першая такая атака адбылася ў лістападзе 2015 года. Тады бус абстралялі з пнеўматыкі, разбілі два шкла.
Праз месяц сітуацыя паўтарылася. Гэтым разам дзве розныя маршруткі на хаду закідалі камянямі, балтамі і гайкамі. Цяжкія прадметы выкідалі з сустрэчных аўтамабіляў, адзін з балтоў нават затрымаўся ў ветравым шкле.
– Тады нашы калегі звярталіся ў мясцовую міліцыю і паказвалі фота аднаго з тых, хто пагражаў. У Навагрудку ў міліцыі яго адразу пазналі. Ад нас прынялі заяву, але неўзабаве справу закрылі. Вінаватыя так і засталіся беспакаранымі, – кажа суразмоўца.
14 сакавіка 2016 года на легальную маршрутку зноў напалі. Гэтым разам абстралялі грунтоўна, разбітыя амаль усе шкла.
– Мікрааўтобус быў прыпаркаваны ў Карэлічах на агульнай стаянцы, а кіроўца спаў дома. Невядомыя людзі ў гадзіну ночы адкрылі агонь па аўтамабілі з пнеўматычнай зброі. Незадоўга да гэтага яны пагражалі кіроўцу, – тлумачыць прадстаўнік легальных перавозак. – Разумееце, там у іх гэта нармальна. Папаліць аўтамабілі, пастраляць у шыбы. Там нават не дзевяностыя, там яшчэ глыбей, сапраўдная Сіцылія.
– Мы прасочваем выразную ўзаемасувязь паміж усімі пагрозамі і вышэйзгаданымі выпадкамі, – кажа перавозчык. – Калектыўна мы зноў звярнуліся ў мясцовую міліцыю, падалі дастатковую колькасць доказаў і доказаў віны канкрэтных асоб. Спадзяемся, што гэтым разам вінаватыя будуць пакараныя. А мы абавязкова перадамо наступствы справы.
