Таннае шоў замест рэальнай аховы

|

З такім зваротам да беларускай і міжнароднай супольнасці напярэдадні святкавання 600-годдзя з моманту пачатку аховы Белавежскай пушчы звярнуўся вядомы беларускі эколаг Георгій Казулька.

Тэкст звароту надрукаваны на сайце greenbelarus.info

На думку Георгія Казулькі, элітныя і камерцыйныя паляванні, меліярацыя, штучныя лесапасадкі, засваенне тэрыторый і сельская гаспадарка доўгі час працавалі супраць Вялікага Белавежскага Лесу.

– Мы не столькі захавалі Белавежскую пушчу, колькі не паспелі забіць яе! І працягваем забіваць з выкарыстаннем своеасаблівых “прыродаахоўных” тэхналогій, хаваючыся за прыгожымі словамі пра запаведнасць і гучнымі святкаваннямі – сцвярджае Георгій Казулька.

Абурэнне спецыяліста выклікае і стан экалагічнай асветы ў пушчы. Узровень экскурсій у Нацыянальным парку такі, што спецыялісты-эколагі проста ў жаху. Замест прапагандавання Белавежскай пушчы як куточка дзікой прыроды з рэліктавай флорай і фаўнай, цэнтральнае месца адведзена таннаму шоў пад назвай «Белорусский Дед Мороз». На думку спецыяліста, усё павінна быць наадварот.

Афіцыйнае святкаванне юбілею пушчы адбудзецца 19-20 верасня.

Удзел ва ўрачыстасцях возьме каля 5 тыс. гасцей з Беларусі, Польшчы, Украіны, Расіі, Літвы.

Кандыдат біялагічных навук Георгій Казулька доўгі час жыве ў Белавежскай пушчы, з’яўляецца кіраўніком працоўнай групы “Прырода і Запаведная справа”, якая дзейнічае ў межах Таварыства “Зялёная сетка”.

На здымку: Георгій Казулька ў час велапрабега па Белавежскай пушчы. 2006 г.

Фота: bp21.org.by