Усе асноўныя стылі тату запатрабаваныя. Казаць пра папулярнасць нейкіх канкрэтных стыляў цяжка. Як увогуле праходзіць запіс? Кліент выказвае агульную ідэю або адразу паказвае малюнак, на якім трэба грунтавацца, а майстар дапамагае канчаткова вызначыцца і выпраўляе тэхнічныя памылкі.
За тату прыходзяць абсалютна розныя людзі – ад 16-гадовых, якім ніхто без дазволу бацькоў татуіроўку рабіць не будзе, да сталых, але маладых у душы людзей. Быў выпадак, рабілі тату 63-гадоваму. Хтосьці прыходзіць зрабіць новую татуіроўку, хтосьці перарабіць тое, што па маладосці зрабіў гадоў 20 таму.
Што тычыцца “папсовых” тату – сімвалаў бясконцасці, іерогліфаў і гэтак далей – я лічу, яны ўжо даўно зжылі сябе. Сёння тату гэта нешта больш мастацкае і індывідуальнае. Бывае, і зараз хтосьці прыходзіць у салон з ідэяй зрабіць такое тату. Тады мы спрабуем патлумачыць, што гэта далёка не арыгінальна. Татуіроўка – рэч вельмі асабістая і да выбару трэба падыходзіць вельмі сур’ёзна. Але апошняе слова, канешне, заўжды за кліентам.
…
Grodno Tattoo club „Pipetka”
Майстар Юля
Яшчэ некалькi гадоў таму iснавала так званая гарадзенская школа татуiроукi, якая з’явілася дзякуючы таленавiтаму гарадзенскаму мастаку Сяргею Стому. У яго атрымалася стварыць свой асаблiвы стыль, асаблiвую падачу малюнка на скуры. Гэта прынесла яму вядомасць не толькi ў Беларусi, але i за яе межамi. Некаторыя майстры з Гродна старалiся пераняць гэтую манеру, але ўжо не так удала.
Сёння Гродна не вылучаецца якiмi-небудзь асаблівымі стылямі, але гэта не сведчыць аб тым, што гарадзенская зямля не мае таленавітых майстроў. Кожны майстар моцны у якiм-небудзь накiрунку, якi складаецца з некалькіх стыляў. У тых майстроў, хто атрымаў мастацкую адукацыю, лепш атрымліваецца працаваць у найбольш складаных стылях, такiх як рэалiзм, трэш-полька, эклектыка.
Доўгi час папулярнымi былi выявы кiтайскiх іерогліфаў, штрыхкодаў, трайблаў, iх змянялi больш складаныя малюнкi японскай татуiроўкi – iерызумi, малюнкi народа маоры – мока, класiчная амерыканская татуiроўка – олд скул. Потым папулярнаць набралi такiя стылi як трэш-полька, ню-скул, чыкана, рэалiзм, дотварк ды iншыя.
У апошнiя два гады папулярнасць пачало набываць беларускае нацыянальнае татуяванне. Асноўным элементам малюнкаў у гэтым стылi стаў беларускi арнамент, выкананы ў розных тэхнiках: трайбл – суцэльная замалёўка фiгуры роўным колерам, дотворк – запаўненне пры дапамозе рознай iнтэнсiўнасцi кропак, iмiтацыя вышыўкi крыжыкам ды iншыя. Таксама папулярнымi элементамi ў гэтым стылi сталi выявы геральдычных сімвалаў, сцягоў, дзеячаў беларускай культуры, вайсковай славы, зуброў, буслоў, каласоў, васiлькоў i iншае.
Сама я апошнi час шмат працую ў гэтым накiрунку i мне гэта вельмi падабаецца. Дзякуючы таму, что людзi сталi часцей выбiраць свае родныя сімвалы, у мяне з’явiлася магчымасць зрабiць шэраг цiкавых работ у беларускiм нацыянальным стылi, з якiмi я займала першыя месцы на фестывалях татуiроўкi ў Беларусi i за мяжой. Нядаўна мне пашчасцiла зрабiць татуяванне па сваім эскiзе на тэму Гароднi – выява аленя Губерта, якi на сваiх рагах трымае галоўныя гарадзенскiя архiтыктурныя помнiкi.
За апошнiя некалькi гадоў змянiўся i сярэднi ўзрост людзей, якiя хочуць зрабiць татуяванне – цяпер гэта не толькi людзi 20-30 гадоў, але i шмат людзей больш сталага ўзросту. Малюнкi становяцца больш абдуманымi i сур’ёзнымi.
Час ад часу, пабачыўшы фота з маiх старонак у сацыялных сетках, мяне пытаюць, цi сапраўднае татуяванне ў майго сабакi. Спяшаюся ўсiх супакоiць – гэта толькi малюнак асадкай. Сама я вегетарыянка па этычных поглядах i не падтрымлiваю сапраўднае татуяванне жывёл. Майму сабаку падабаецца сам працэс нанясення малюнка, ён успрымае гэта як масаж.
Адно з найбольш частых пытанняў – як атрымаць якаснае татуяванне i не пашкадаваць пра гэта. Перш за усё, трэба шукаць майстра непасрэдна пад стыль малюнка. Паглядзець работы майстра ў гэтым накiрунку, пацiкавiцца пра ўмовы стэрыльнасцi. Пачытаць водгукi пра гэтага мастака. Паказчыкам якасцi майстра будуць ягоныя дыпломы i ўзнагароды.
…
Liberty INK Tattoo Studio
Майстар Павал Семенчанка
Тату-культура расце і развіваецца па ўсёй Беларусі, таму ўсё больш людзей забіваюцца свядома ў пэўных стылях. У тым ліку і ў Гродне. Сам аддаю перавагу традыцыйнаму стылю і графіцы, у гэтых стылях і б’ю.
Людзі розныя прыходзяць. У асноўным гэта цікавыя і прыемныя асобы, з якімі ўвесь сеанс ідзе добры дыялог. Але і не надта прыемных хапае.
Прыходзяць забівацца людзі ўсіх узростаў. Быў выпадак, прыходзіла маці з непаўналетняй дачкой, якой тату і рабілі.
…
RayaTattoo
Майстар Рая Татушкіна
Наконт стыляў – стараюся не вылучаць штосьці адно. Густы ў людзей розныя. Дакладна магу сказаць, што робяцца папулярнымі татуіроўкі ў выглядзе беларускага нацыянальнага арнамента.
Бывае, прыходзяць людзі з жаданнем зрабіць штосьці накшталт нотак, ці іерогліфаў на запясці, але такіх ужо менш. А ўвогуле, якасная татуіроўка – вынік шчыльнай працы майстра з кліентам. Я стараюся заўжды штосьці раіць кліенту, да кожнага знайсці свой падыход, падабраць штосьці індывідуальнае. Да і ў час працы заўжды размаўляю – што, як, чаму такі выбар. Укладваюся ў кожную працу, таму не паўтараю ўжо зробленую іншаму чалавеку.
Узрост у кліентаў розны – ад ледзь паўналетніх да пенсіянераў. Дарослыя людзі пачалі часцей падцягвацца.
