Экс-старшыня “Беллегпрама” асуджаны да 10 гадоў пазбаўлення волі за карупцыйныя злачынствы

|

Былы старшыня канцэрна “Беллегпрам” за карупцыйныя злачынствы асуджаны да 10 гадоў пазбаўлення волі. Прысуд у дачыненні да яго, а таксама ў дачыненні да былога кіраўніка ААТ “Слонімская камвольна-прадзільная фабрыка” і аднаго з кіраўнікоў ТАА “Флексомир” вынесены сёння Гарадзенскім абласным судом, перадае  БЕЛТА. 


Былы старшыня канцэрна “Беллегпрам” прызнаны вінаватым па ч.1 арт.14 КК (замах на злачынства), ч.3 арт.430 КК (атрыманне хабару), ч.3 арт.424 КК (злоўжыванне ўладай або службовымі паўнамоцтвамі) і асуджаны да 10 гадоў пазбаўлення волі з адбываннем ў калоніі ўзмоцненага рэжыму, з канфіскацыяй маёмасці, а таксама з пазбаўленнем права займаць пасады, звязаныя з выкананнем арганізацыйна-распарадчых абавязкаў, тэрмінам на 5 гадоў.

 

Былая дырэктарка ААТ “Слонімская камвольна-прадзільная фабрыка” прызнана вінаватай па ч.1 арт.13 КК (падрыхтоўка да злачынства), ч.3 арт.430 (атрыманне хабару), ч.2 арт.426 КК (перавышэнне ўлады або службовых паўнамоцтваў), ч.1 ст.211 КК (прысваенне або растрата), ч.2 арт.210 КК (крадзеж шляхам злоўжывання службовымі паўнамоцтвамі) і асуджана да 6,5 гадоў пазбаўлення волі з адбываннем у калоніі агульнага рэжыму, з канфіскацыяй маёмасці, а таксама з пазбаўленнем права займаць пасады, звязаныя з выкананнем арганізацыйна-распарадчых абавязкаў, тэрмінам на 5 гадоў.

 

Намеснік дырэктара ТАА “Флексомир” прызнаны вінаватым па ч.1 арт.14 КК (замах на злачынства), ч.1 арт.431 КК (дача хабару) і асуджаны да 4 гадоў абмежавання волі.

 

Службовыя асобы былі затрыманыя ў лютым 2014 года. Тады паведамлялі, што былы дырэктар “Беллегпрама” з 2012 года ствараў умовы для атрымання хабару шляхам складання плана злачынства і пошуку асоб, якія ў будучыні маглі б стаць  хабарадавальнікамі. З гэтай мэтай ён прыцягнуў да супрацоўніцтва ўдзельнікаў таварыства ТАА “Флексомир”, каб яны забяспечылі падбор тэхналагічнага прадзільнага абсталявання для абсталявання  ААТ “Сукно” і асоб, здольных забяспечыць фінансавыя ўмовы пастаўкі абсталявання так, каб грашовыя сродкі паступалі асабіста кіраўніку.Са свайго боку ён абяцаў забяспечыць бесперашкодную рэалізацыю здзелкі за ўзнагароду не менш за 1 млн еўра. Ўмовы здзелкі абмяркоўваліся падчас аплачанага адпачынку сям’і экс-дырэктара з пасярэднікамі на Канарскіх выспах.

 

Экс-кіраўнічка Слонімскай КПФ таксама пры закупцы абсталявання для мадэрнізацыі наўмысна ажыццяўляла дзеянні, што павінны былі прывесці да атрымання хабару. Па дадзеных абвінавачвання, яна мела намер атрымаць не менш за 3% ад кошту абсталявання (не менш як 36 тыс. Еўра), таксама яна прысвоіла камандзіровачныя і грошы за білеты, якія ёй аплаціў прымаючы бок.  Кошт абсталявання па заключаным з пасярэднікам кантракце, інтарэсы якога яна лабіравала пры правядзенні конкурсу, на 140 тыс. Еўра перавышала кошт вытворцы.

 

Прысуд у законную сілу не ўступіў і можа быць абскарджаны ва ўстаноўленым парадку.