Словы – высокія, аўдыторыя – пасіўная
Калі перайсці да персаналій, удзельнічалі: гісторыкі І. Соркіна, С. Сілава, Ю. Гардзееў (выкладае гісторыю Беларусі і беларускую мову ў Ягелонскім універсітэце ў Кракаве на факультэце міжнародных адносінаў); іерэй І. Данільчык (святар Святабарысаглебскай царквы ў Гродна), рэалізатары праекту «Будзьма беларусамі!» І. Лялькоў і С. Квяткоўскі.
Па колькасці слухачоў, а іх было чалавек 30, можна меркаваць пра зацікаўленасць студэнцтва і ўвогуле грамадскасці да вырашэння моўнага пытання ў нашай краіне і да праблемы выратавання роднай мовы або разрэкламаванасці дадзенага мерапрыемства.
З уступным словам выступіў дэкан факультэту псіхалогіі Уладзіслаў Баркоў. Хоць і па-руску, за што, дарэчы, папрасіў прабачэння, але адзначыў неабходнасць пачынаць выхаванне з беларускай мовы. Не атрымліваючы грунтоўных ведаў па роднай мове ў дзяцінстве, моладзь набывае няпоўную адукацыю, а гэта ў сваю чаргу ўплывае на яе свядомасць і сацыяльныя паводзіны.
Госці з Менску распавялі пра культурніцкую кампанію «Будзьма беларусамі!». Яна пачала рэалізоўвацца з 1 кастрычніка 2008 году і мае на мэце папулярызацыю сучаснай беларускай культуры ў розных яе праявах, папулярызацыю беларускай мовы. Для яе ажыццяўлення за год было праведзена 927 мерапрыемстваў рознага кшталту: канцэрты, літаратурныя сустрэчы, мастацкія выставы, экскурсіі, літаратурна-гістарычныя лекцыі, курсы па беларускай мове – у 147 населеных пунктах – як вялікіх гарадах, так і малых, а таксама ў вёсках. Найбольш актыўнымі аказаліся Гродна, Віцебск, Магілёў і іх ваколіцы. Севярын Квяткоўскі пазнаёміў з дзейнасцю сайту кампаніі «Будзьма беларусамі!». «Будзьма разам!» (www.budzma.org). 30% наведвальнікаў яго складаюць мінчукі, 20% – жыхары малых гарадоў і вёсак, 50% – вялікіх гарадоў. Адным з самых цікавых праектаў сайту з’яўляецца праект «Як я стаў беларусам», праз які беларусы аналізуюць, як яны развіваюць самасвядомасць.
Ігар Данільчык, прафесійны філолаг і святар па сумяшчальніцтве, выказаў агульныя разважанні наконт значэння і месца мовы ў жыцці і дзейнасці чалавека, яе чысціні. Пасля выступлення разгарэлася дыскусія з нагоды правільнасці перакладу на беларускую мову тэкстаў Святога пісання, адносінаў Беларускай праваслаўнай царквы да беларускай мовы. Святар адзначыў, што ў Каложскай царкве кожную сераду праводзяцца малебны за Беларусь і беларускі народ, а таксама праводзяцца таінствы на роднай мове.
Юры Гардзееў падзяліўся сваімі ўражаннямі, назіраннямі, вопытам і методыкай выкладання беларускай мовы за мяжой, у Польшчы, у прыватнасці. Польскія студэнты з цікавасцю ставяцца да заняткаў, хоць і бываюць яны 1 раз на тыдзень. На іх слухаюць беларускую музыку, пішуць дыктоўкі, глядзяць фільмы. Для паглыблення, удасканалення і прымянення на практыцы набытых ведаў падтрымліваюць сувязі з мінскімі студэнтамі. Іна Соркіна паспрабавала даць адказ на пытанне чаму неабходна зберагчы родную мову, а Юлія Катаржынская расказала пра беларускую мову ў жыцці грамадства.
>
Аўдыторыя была даволі пасіўнай і нешматлікай, і застаецца спадзявацца, што высокія словы пра нашу родную мову ўпалі не на пустую глебу.