Анжаліка Борыс ідзе ў адстаўку
Пра сваё рашэнне пайсці ў адстаўку Анжаліка Борыс паведаміла сваім паплечнікам у суботу.
Як паведмляе “Rzeczpospolita“, свае бліжэйшыя планы сп-ня Борыс звязвае з навучаннем у Польшчы, дзе яна хацела б абараніць доктарскую працу.
Як паведамляе выданне, большасць дзеячоў непрызнанага Саюзу палякаў звязвае рашэнне Анжалікі Борыс з аграмадным ціскам з боку беларускіх уладаў.
Толькі на працягу гэтага года яе шмат разоў затрымлівалі ў сувязі з сітуацыяй вакол Польскага дома ў Івянцы, абкладалі штрафамі фірму “Палоніка”, якой кіравала Борыс, канфіскоўвалі ўласную хатнюю маёмасць.
У час размоваў з сваімі паплечнікамі Анжаліка Борыс не хавала, што безперапынны ціск і рэпрэсіі з боку ўладаў адгулялі істотную ролю ў прыняцці ёй рашэння пра адстаўку.
Разам з тым, сп-ня Борыс катэгарычна адхіліла меркаванне, што адыйшла пад ціскам асобных польскіх палітыкаў і польскага міністэрства замежных справаў, нібыта зацікаўленых у яе адстаўцы дзеля паляпшэння стасункаў з Мінскам.
Падобную версію, аднак, не выключаюць некаторыя польскія ўплывовыя палітыкі.
Адзін з іх ананімна заявіў выданню, што адстаўка Борыс – гэта рэалізацыя даўно выпрацаванага ў польскім МЗС сцэнару.
Анжаліка Борыс нарадзілася ў 1973 г. ў Гарадзенскім раёне.
Вышэйшую адукацыю атрымала ў Беластоку (педагогіка і псіхалогія). Працавала ў Гродне настаўніцай польскай мовы.
У 1995-м г. уступіла ў Саюз палякаў, дзе пазней стала кіраўніцай аддзелу асветы.
У 2005-м г. была абрана кіраўніцай СПБ.
Міністэрства юстыцыі Беларусі, аднак, прызнала з’езд, на якім гэта адбылося, нелегітымным.
У хуткім часе беларускія ўлады арганізавалі новы з’езд, на якім кіраўніком арганізацыі быў абраны пенсіянер Лучнік.
Ад гэтага моманту ў Беларусі дзейнічаць два Саюзы палякаў.
У сакавіку 2009 г. Анжаліка Борыс была абрана кіраўніцай непрызнаваемага беларускімі ўладамі СПБ на новы чатырохгадовы тэрмін.