На гродзенскіх вуліцах з’явіліся тралейбусы апошняй мадыфікацыі

18 кастрычніка 2010 Кася Крот |

Цягам 2 месяцаў гродзенскае тралейбуснае ўпраўленне атрымае 37 тралейбусаў апошняй мадыфікацыі вытворчасці “Белкамунмаша”.

Трохфазны рухавік дазваляе эканоміць да 30% электраэнергіі, а ў сярэдніх дзвярах прадугледжаны пандус для інвалідных і дзіцячых вазкоў.

Усе новыя машыны пойдуць на замену старых, яшчэ савецкіх тралейбусаў.

Пашыраць тралейбусны парк, які ў Гродне налічвае 150 машын, пакуль няма ніякіх магчымасцяў.

Дэпо, разлічанае на 100 машын, і без гэтага вымушанае абслугоўваць 150.

У праекце бюджэта на наступны год закладзены сродкі на пачатак праектавання новага тралейбуснага дэпо.

Калі бюджэт зацвердзяць, праз год імаверна будзе падрыхтаваны праект, а яшчэ гады праз два магчыма пабудуюць дэпо.

Да гэтай пары разлічваць на павелічэнне колькасці тралейбусаў на маршрутах гродзенцам не выпадае.