Міністэрства культуры адказала абаронцам Каложы

|

Зварот арганізатараў і экспертаў адкрытых грамадскіх слуханняў па праблеме рэканструкцыі Каложскай царквы да Паўла Латушкі міністэрства культуры разглядала сумесна з Гродзенскім аблвыканкамам, прадстаўнікамі “Гроднаграмадзянпраекта”, мітрапалітам Філарэтам і епіскапам Гродзенскім і Ваўкавыскім Арцеміем.

 

Азнаёміўшыся з праектам рэканструкцыі Барысаглебскай (Каложскай) царквы, прадстаўленым архітэктарам Г.Лаўрэцкім, эксперты і ўдзельнікі грамадскіх слуханняў выказалі сур’ёзныя сумненні ў мэтазгоднасці яго рэалізацыі.

Яны звярнуліся да міністра культуры з просьбай яшчэ раз разгледзіць праект рэканструкцыі Каложскай царквы на паседжанні Рэспубліканскай навукова-метадычнай рады па пытаннях гісторыка-культурнай спадчыны пры Міністэрстве культуры.

 

Міністэрства культуры заклапочанасці грамадзкасці не падзяляе.

У адказе аўтарам звароту паведамляецца пра тое, што навукова-метадычная рада разглядала пытанні аб правядзенні работ на Каложскай царкве неаднаразова пачынаючы з 1994 года.

Праектная прапанова Г.Лаўрэцкага была ўхваленая яшчэ 24 снежня 2008 года (пратакол №149).

Падставай для аднаўлення страчаных муроў з’яўляюцца акварэлі 19 стагоддзя, якія захоўваюцца ў Расійскім дзяржаўным гістрарчным архіве С.-Пецярбургу.

 

На пытанне аб недапушчальнасці выкарыстання сучасных будматэрыялаў, у лісце з міністэрства культуры паведамляецца, што міжнародная практыка такі падыход не выключае.

Вопытныя ўзоры цэглы, якая па сваіх памерах адпавядае плінфе, але адрозніваецца ад яе па колеры і характары паверхні, ужо выраблены краснасельскім заводам будматэрыялаў.

Гіпсакартон на Каложы выкарыстоўвацца не будзе, а іншыя матэрыялы будуць прымененыя з мэтай памяньшэння нагрузкі на схіл Каложскага плато.

Аўтараў звароту непакоіла адсутнасць даследаванняў тэхнічнага стану сцяны і двух слупоў ХІІ ст.: пасля рэалізацыі праекту рэканструкцыі нагрузка на сцяну ў разы павялічыцца, слупы ж стануць нясучым элементам даху, што можа выклікаць іх разбурэнне.

Па дадзеных міністэрства культуры ўсе неабходныя даследванні праведзеныя “Гроднаграмадзянпраектам”, і ўстойлівасць канструкцыі адпавядае будаўнічым нормам.

 

Апошнім аргументам абаронцаў Каложы была адсутнасць у Беларусі падрадчыка, які здолеў бы выканаць працы па рэканструкцыі на адпаведным высокім узроўні. (Прыводзіліся прыклады рэканструкцыі Нясвіжскага і Лідскага замкаў, падчас якіх помнікам архітэктуры і культуры была нанесена непапраўная шкода).

На гэта супрацоўнікі мінкульта адказваюць, што падцвярджэннем кваліфікацыі выканаўцаў работ з’яўляецца Ліцэнзія, якая выдаецца ў парадку, вызначаным Міністэрствам архітэктуры і будаўніцтва.

А за адпаведнасць дзеючым нарматыўным патрабаванням у выкананні работ нясе адказнасць заказчык.

 

Аўтары звароту адказам міністэрства культуры засталіся незадаволеныя.

Гісторык Андрэй Вашкевіч: “Канешне, ліст у большай ступені нагадвае адпіску. Грунтоўнага разгляду нашых перасцярогаў не адбылося, і ніякага памкнення да дыялогу мы не ўбачылі”.