Аддзел адукацыі заняўся пастаўкамі ежы ў садкі

|

Дзіцячыя дашкольныя ўстановы цяпер атрымліваюць харчаванне наўпрост ад аддзелу адукацыі. Як паведаміла “Твайму стылю” начальніца аддзелу адукацыі Кастрычніцкага раёна Гродна Святлана Арлова, пастаўкі без пасярэднікаў дазволяць знізіць кошты на харчаванне дашкольнікаў.


Раней пасярэднікам у пастаўках харчавання дашкольнікам быў “Прадсервіс”.

 

Да гэтага 10-15% ад кошту прадукцыі мы вымушаныя былі аддаваць на аплату паслуг пасярэдніка – каментуе “Твайму стылю” сітуацыю загадчык аддзелу адукацыі гарадзенскага гарвыканкаму Сяргей Блажэй.

 

Па словах сп. Блажэя, зараз ідзе ўзгадненне з аблвыканкамам коштаў на закупку новых лядоўняў для дашкольных установаў.

 

Гэта дазволіць захоўваць прадукты харчавання больш працяглы час, што зменшыць выдаткі на іх транспартыроўку.

 

Новая схема забеспячэння садкоў ежай дзейнічае ў Гродне з 27 студзеня.