Сёння – Міжнародны дзень роднай мовы
Магчыма таму на канцэрце, якім распачаўся сённяшні дзень у Гродзенскім дзяржаўным універсітэце імя Янкі Купалы, студэнты адзяленняў беларускай, польскай і рускай філалогіі па чарзе ўславілі кожны “сваю” мову.
Упраўленне культуры Гродзенскага аблвыканкама спецыяльных мерапрыемстваў да Міжнароднага дня роднай мовы ўвогуле не планавала.
Галоўны спецыяліст упраўлення культуры Людміла Лебедзь:
– Спецыяльна мы нічога сёлета не планавалі, але ў нас рэалізуецца ўзгодненая з Міністэрствам культуры праграма па пашырэнні ўжывання беларускай мовы.
Там прадугледжана ўсё, ад вядзення дакументацыі на беларускай мове да яе ўжывання ў навучальным працэсе, пры правядзенні мерапрыемстваў, лекцый, экскурсій.
У нас ва упраўленні культуры, напрыклад, большасць дакументацыі вядзецца на беларускай мове.
Але беларуская і руская мова ў нас развіваюцца на парытэтнай аснове.
Мы не дыктуем, на якой мове, рускай ці беларускай, праводзіць лекцыі, экскурсіі, – гэта вырашаецца па жаданні наведвальнікаў.
Таварыства беларускай школы, як звычайна, адзначае Дзень роднай мовы беларускай дыктоўкай. Аднак у Гродне яна адбудзецца толькі праз месяц, бліжэй да 25 сакавіка.
Затое на сёння ў горадзе няма ніводнай беларускай школы, нават беларускага класа.
Прафесар Астроўскі ў верасні дамогся для сваёй дачкі-першакласніцы права вывучаць асноўныя прадметы на беларускай мове.
А праз некалькі дзён у іншай гродзенскай гімназіі настаўніца (у адпаведнасці з законам) прымусіла вучня замяніць дзённік, запоўнены на беларускай мове.
Было парадаваў гродзенскіх аматараў беларускай мовы новы старшыня аблвыканкаму Сямён Шапіра, які загаварыў пра неабходнасць больш шырокага выкарыстання беларускай мовы ў працы чыноўнікаў.
Аднак пазней ён выказаў незадаволенасць “інфармацыйнай падаплёкай” вакол ініцыятывы пашырыць выкарыстанне беларускай мовы сярод сваіх падначаленых і нагадаў, што ў Беларусі кожны мае права выбару мовы і ніхто не абавязаны адказваць за тое, што не размаўляе па-беларуску.
Выказванні пра тое, што беларусізацыя пачалася пасля звароту “Таварыства беларускай мовы”, Шапіра назваў спекуляцыяй.
І дадаў, што прыпыніў гэтую практыку.
Фота з сайта http://vialejka.org