Летні час у Беларусі можа застацца назаўжды

|

У нядзелю стрэлкі ўсіх беларускіх гадзіннікаў традыцыйна для апошняй нядзелі сакавіка будуць пераведзеныя на гадзіну наперад.

Ці вернемся мы ўвосень да зімовага  часу, вырашыцца цягам некалькіх месяцаў.


Як паведаміў БЕЛТА намеснік старшыні Дзяржаўнага камітэта па стандартызацыі Сяргей Іўлеў, міжгаліновая камісія часу, частаты і вызначэння параметраў абароту Зямлі разгледзіць гэтае пытанне да лета 2011 года.

На рашэнне ўрада Беларусі безумоўна паўплывае не толькі меркаванне медыкаў і эканамічныя разлікі, але і рашэнне Расіі, якая збіраецца адмовіцца ад пераводу гадзіннікаў на зімовы час.

Зараз часавыя паясы Беларусі і Расіі адрозніваюцца на адну гадзіну, хутчэй за ўсё Беларусь пастараецца такі стан рэчаў захаваць.

 

Сяргей Іўлеў:

Мы ажыццяўляем такі пераход для таго, каб карэспандаваць яго з суседнімі краінамі, дзе таксама пераводзяць стрэлкі гадзінніка, каб мы жылі ў прасторы, дзе скаардынаваныя часавыя пераходы.

…Калі ў Расіі прымуць рашэнне ўвосень не пераходзіць на зімовы час, то Беларусь застанецца фармальна адзінай краінай у ЕўрАзЭС, у Мытным саюзе, дзе такі працэс будзе захоўвацца.


Два разы на год мяняюць час на зімовы і летні каля 80 краін у свеце.

Эканамічная мэтазгоднасць пераводу стрэлак гадзіннікаў выклікае ўсё большыя сумнівы, затое медыкі кажуць пра відавочную шкоду змены часу для здароўя, асабліва дзяцей і сталых людзей.

 

Фота з сайта http://www.liveinternet.ru