Звыш ста чалавек прыйшлі сёння падтрымаць Андрэя Пачобута

|

Журналіста судзяць у судзе Ленінскага раёна Гродна. У будынак суда не пусцілі нават жонку журналіста Аксану.


Выказаць сваю салідарнасць з карэспандэнтам “Газеты Выборчай” прыйшлі журналісты з Гродна і Мінска, актывісты польскага руху і грамадскіх арганізацый краіны і горада.

 

Людзі ля прыступак суда гучна маліліся, спявалі рэлігійныя песні, скандавалі “Свабода!” і “Дэмакратыя!”.

У інтэрв’ю журналістам Аксана Пачобут распавяла пра сваю спробу патрапіць у памяшканне, а таксама пра тое, як рэагуюць яе дзеці на такую працяглую адсутнасць бацькі ў доме.

 

Гэта ўжо другі судовы працэс у Гродне супраць журналістаў, якіх вінавацяць у знявазе прэзідэнта.

 

У 2002 г. у гэтым жа судзе да пазбаўлення волі былі асуджаныя журналісты Павал Мажэйка і Мікола Маркевіч.

 

У інтэрв’ю “Твайму стылю” Павал Мажэйка распавядае пра тое, чым адрозніваецца працэс Пачобута ад суда над ім, а таксама дзеліцца сваім прагнозам на вынік суда.

 

Судовае паседжанне доўжылася сёння да 16.30.

 

Суддзя задаволіў хадайніцва пракурора зрабіць перапынак ў сувязі з неабходнасцю перакваліфікавання абвінавачвання.

 

Суд працягнецца 17 чэрвеня а 10-й раніцы.

 

Андрэя Пачобута абвінавачваюць у абразе Аляксандра Лукашэнкі і паклёпе на яго.

 

За гэта журналісту пагражае ад 2 да 4 гадоў турмы.

 

З 6 красавіка ён знаходзіцца за кратамі следчага ізалятару ў Гродне.

 

Справу журналіста разглядае суддзя Віталь Ляцко.